In onn suenter ina da las pli grondas chaumas ch’igl ha ina giada dà en Svizra, van las dunnas ed umens che supportan ellas, puspè sin via. Schegea ch’els hajan mess en moviment ina massa, na tanschia quai betg cun protestar mo ina giada, di l’organisatura da la chauma da seser en Grischun, Angela Thiele. Ins stoppia star vidlonder e vinavant sensibilisar la glieud.
Il pli impurtant è uss da sensibilisar sin las professiuns che han pajas minimalas sco la secziun da sanadad u il commerzi en detagl.
Umens en il homeoffice cun uffants
La dunna da 35 onns crai, ch’il temp da corona haja era avert ils egls als umens. Cura che lezs han uss stuì far homeoffice a chasa, sajan blers vegnids pertscherts, quanta lavur il tegnair chasa, mirar dals uffants e lavurar muntan. Uschia haja dà ina reponderaziun tar blers umens e quai fa plaschair ad Angela Thiele.