Ils 17 da schaner 2026 è mort l’anteriur cusseglier guvernativ Aluis Maissen da Cuira en la vegliadetgna da 88 onns. Quai san ins leger en l’annunzia da mort en l’ediziun da La Quotidiana dals 20 da schaner 2026.
Aluis Maissen è stà cusseglier guvernativ dal chantun Grischun durant ils onns 1989 fin 1998. Ils emprims dus onns ha il cristiandemocrat timunà il departament da giustia e polizia, silsuenter il departament da finanzas e militar. Ils onns 1993 e 1997 ha el presidià la regenza.
Il politicher
Durant ses temp sco schef da finanzas ha Maissen avertì d'expensas inutilas ed accentuà la solidaritad da las finanzas chantunalas. El era er conscient che decisiuns politicas na valian betg per l'eternitad e ch'ils basegns da la populaziun sa midian cuntinuadamain.
Ses engaschament per ils burgais e per las burgaisas saja adina stà caracterisà da la persvasiun che la lavur politica saja ina furma da servetsch, è Aluis Maissen vegnì cità en la gasetta Südostschweiz cura ch'el ha la fin da l'onn 1998 annunzià da sa retrair dal mund politic.
Aluis Maissen ha ademplì blers mandats politics, tranter auter è el stà president dal cussegl d'administraziun da la Viafier retica u era schef da fracziun da la Partida cristiandemocratica, oz Partida dal Center, en il Cussegl grond.
Archiv
Il president da la regenza Aluis Maissen ha l'onn 1993 tegnì il pled da Bumaun. Quai è capità en rama d'ina seria da pleds da presidents da la regenza che la Televisiun Rumantscha ha emess ils onns 80 e 90.
Il scriptur Flurin Spescha ha fatg in'intervista cun Aluis Maissen l'onn 1995.