Il politicher da Haldenstein è stà il 2007 confundatur ed in dals represchentants ils pli enconuschents da la Partida verd-liberala grischuna. El è vegnì elegì per la legislatura dal 2010-2014 en il Cussegl grond e l'onn 2011 en il Cussegl naziunal. Politisà en il Cussegl grond ha el alura dal 2010-2012 e durant ina segunda perioda d'uffizi dal 2018-2021.
Josias Gasser è stà ina impurtanta figura per la Partida verd-liberala en il Grischun. Durant ses temp è la partida creschida en il Grischun ed ha conquistà plirs sezs en il Cussegl grond. Sco che la presidenta actuala da la PVL, Géraldine Danuser, scriva, laschia el enavos ina rusna.
Cun sia cumpetenza, ses engaschi ed in cler cumpass per valurs verd-liberalas ha Josias Gasser influenzà nossa partida a moda persistenta.
Jürg Grossen, il president da la partida naziunala, agiunta ch'i giaja a perder ina persuna marcanta. Ses umor, ma er sia funcziun sco «construider da punts» vegnia a mancar.
Jau ma regord d'in grondius visiunari, d'in impressari cun bler success ed era d'in cumbattant carismatic.
L'emprim ed enfin uss ultim verd-liberal grischun a Berna
Il 2011 è Gasser lura vegnì elegì surprendentamain en il Cussegl naziunal ed è uschia stà l'emprim ed enfin oz l'ultim represchentant verd-liberal ch'il Grischun ha tramess a Berna. Quatter onns pli tard ha el però pers ses mandat. El ha stuì far plaz a Magdalena Martullo ch'ha conquistà il sez da Gasser per la Partida populara. Il 2019 ed il 2023 ha Gasser danovamain candidà per il Cussegl naziunal, quai dentant senza success. Da las ultimas elecziuns ha el candidà en il chantun Sviz perquai ch'el viveva là.
Lunga carriera politica
Enconuschent era Josias Gasser er sco interprendider. El ha manà plirs decennis ina firma cun material da construcziun. Sper quai è el stà in pionier en chaussas energia da vent en il Grischun. Ensemen cun Jürg Michel ha Josias Gasser inizià e realisà la roda da vent a Haldenstein ch'è dapi il 2013 en funcziun. Il favrer 2025 ha il suveran da Cuira ditg Gea ad ina segunda roda da vent a Haldenstein. Ils resultats da l'engaschi da Josias Gasser vegnan pia er en futur ad esser visibels.