Ina festa gronda na fetschia el betg, di Giusep Nay en l’intervista cun RTR. Festas grondas haja el fatg cun 60 e 70 onns. Questa giada n’haja el en sasez vulì far nagut. Ma la famiglia haja vulì festivar.
La festa avain nus gia fatg la fin d’emna passada cun l’entira famiglia, figlias, biadias e biadis.
Il Sursilvan è naschì ils 9 d’avust a Trun ed è creschì si en in ambient puril. «Nus na faschevan betg sez ils purs, ma sco buobet, a partir da set onns, avevan ins mintga stad dad ir a gidar ils purs.» Quai saja stà in bellezza temp.
Suenter il gimnasi a la scola claustrala a Mustér ha el studegia giurisprudenza a Friburg e Turitg e terminà il studi cun la lavur da doctorat «Das Jugendstrafverfahren im bündnerischen Recht». Lura ha el percurrì ina tipica carriera da giurist:
- actuar a la dretgira chantunala
- agen biro d’advocatura a Cuira
- derschader accessoric a la dretgira districtuala Plessur
- derschader a la dretgira chantunala
Punct culminant
L’october 1988 elegia l’assamblea federala Giusep Nay sco derschader federal. Ils onns 2005 e 2006 è el president da la dretgira federala. El è fin oz il sulet giurist rumantsch che ha cuntanschì quest uffizi.
Suenter sia pensiun il 2006 resta il giurist activ en uniuns ed instituziuns. El publitgescha essais, columnas ed artitgels tar temas dal dretg fundamental, dal dretg da linguas u dal dretg da baselgia. Ils ultims onns è el s’engascha sco cussegliader per il whistleblower Adam Quadroni.
I saja stà fitg bel da pudair lavurar suenter la pensiun anc tants onns per il dretg. Uss haja el dentant dà giu tut ses uffizis.
Or da l'archiv
