Ch'i dettia magari stretgas da medicaments saja usità, di la presidenta da las apotecras ed ils apotechers grischuns, Monika Fehr. Dentant è la problematica s’accumulada ils ultims trais fin quatter onns. Mancanzas datti en tuttas spartas da medicaments.
Daventà mintgadi
En las apotecas saja daventà mintgadi ch'ins stoppia tschertgar alternativas u consolar la clientella ch'ella stoppia spetgar pli ditg. Bleras giadas han las apotecas indicaziuns cura ch'il medicament giavischà saja puspè disponibel. I dat dentant er cas ch'il furnitur na po betg dir quant ditg ch'i giaja fin ch'il product è puspè disponibel.
Fin uss n'avain nus gì nagins cas nunschliabels – nus avain adina chattà ina soluziun per il client u la clienta.
Per part han ins stuì avrir ils magasins dal militar per servir il martgà da medicaments. Tenor Monika Fehr saja la mancanza er ina consequenza dal squitsch da pretschs che saja enorm. Uschia ch'i vegnia pli e pli savens producì en l’Asia ed en l’India. Actualmain n'è betg en vista che la situaziun pudess sa calmar.
