La cuminanza da lavur dals pajais da las Alps «Arge Alp» va sur 10 regiuns en 4 differents pajais. Regiuns sco la Baviera u il chantun Grischun èn da la partida, medemamain sco era il Vorarlberg ubain la Lumbardia. Il presidi da la cuminanza mida mintg’on. Questa giada ha cussegliera guvernativa Barbara Janom Steiner pudì surdar il presidi al guvernatur dal Tirol dal Sid, Arno Kompatscher.
Per finir anc 3 resoluziuns per maun dal parlament europeic
Durant l'onn da presidi dal chantun Grischun è la forza idraulica stada il tema da paisa. Durant l’entir onn è il Grischun s'occupà cun la forza idraulica. Tranter auter hai era dà in simposi davart la forza idraulica. Per la fin da l’onn da presidi ha la cuminanza da lavur dals pajais da las alps stipulà ina resoluziun davart il diever da la forza idraulica. En quella resoluziun è vegni punctuà che l'augment dal diever da la forza idraulica duess succeder sut aspects ecologics, economics e socials.
Proxim tema da paisa: «Depopulaziun da regiuns periferas»
Sper la resoluziun davart il diever da la forza idraulica ha la Arge Alp anc inoltrà al parlament europeic ina resoluziun cun il tema educaziun ed ina resoluziun davart la regulaziun da la populaziun dal luf en las Alps. Il tema da paisa da l’onn da presidi dal Tirol dal Sid vegn ad esser la depopulaziun da las regiuns periferas.
RR actualitad 17:00
