Il project «Myclimate Klimafonds Davos» gudogna in premi pervia da la muntada per proteger il clima. La destinaziun da turissem Tavau Claustra vul daventar clima-neutrala fin 2030 ed uschia esser l'emprima destinaziun da vacanzas clima-neutrala da la Svizra. Ella gudogna en la categoria «projects gronds» e sto parter l'emprim plaz cun in project da la Bavaria. Quai annunzia il chantun Grischun en ina communicaziun.
Il premi en la categoria «start-ups» va ad «e-cyclus», ad Amin Casutt e ses partenaris che han sviluppà in management digital da dismetter ruments ed introducir in'economia circulara. Il project prevesa tant d'optimar il process da recycling sco era da reducir la producziun da rument. La giuria d'experts è stad persvadida da l'utilitad concreta per tut ils partenaris.
La «Arge Alp» è ina cuminanza da lavur da las regiuns alpinas e represchenta ils interess da quellas, per exempel en l'Uniun Europeica. Sper premiar ils victurs per schliar la problematica da la midada dal clima, ha ella er decidì da sa barattar meglier davart animals da rapina gronds.