La damaun a las indesch a la staziun dal tren a Cuira: Rosa Lachenmeier e ses partenari Hanspeter Funke èn pronts per ina nova tura. Els partan cun lur velos per lung dal Rain. L'artista Rosa Lachenmeier ha per finamira da purtretar tut las punts dal Rain – i sa tracta qua da circa 200 punts. Oz stattan sin il program las punts davent da La Punt/Reichenau fin Cuira.
Siemi d'uffanza
Gia baud è Rosa Lachenmeier vegnida en contact cun l'art, cunquai ch'ella è creschida si en ina famiglia da picturs e picturas. Sco mattetta ha l'artista survegnì cun, co maletgs da Picasso èn vegnids cumprads a Basilea.
Jau hai pensà: Uau, quests maletgs èn uschè chars – jau vi era daventar artista!
Quest siemi è ì en vigur: Rosa Lachenmeier ha instruì varga 30 onns sco docenta a la scola per art da Basilea e realisescha agens projects.
Sin via a La Punt/Reichenau è Rosa Lachenmeier en patratgs gia tar ses project actual, cun il qual ella ha cumenzà l'onn 2018. Dapi l'onn 2020 lavura ella sistematicamain vidlonder. Per sa preparar per oz ha ella retschertgà e fatg ina glista cun tut las punts. Durant ir cun velo contempla ella la cuntrada e ponderescha co far la fotografia ideala. L'artista sa sprova da chattar in detagl unic tar mintga punt, per che mintga ovra haja insatge agen.
Intginas ovras dal project actual
-
Bild 1 von 3Legenda: Neuchâtel – Ottmarsheim, autostrada A36, WVZ 1495. Rosa Lachenmeier
-
Bild 2 von 3Legenda: Eglisau, viaduct dal Rain, WVZ 1562. Rosa Lachenmeier
-
Bild 3 von 3Legenda: Weil am Rhein – Huningue, Dreiländerbrücke (Passerelle des Trois Pays), WVZ 1491. Rosa Lachenmeier
Surpraisas durant process da lavur
Arrivads a La Punt/Reichenau, nua ch'il Rain Anteriur finescha, siglia Rosa Lachenmeier gist giu dal velo per fotografar l'emprima punt. Uss è l'artista en ses element: Ella raiva, mida posiziun ed experimentescha cun differentas perspectivas.
A La Punt/Reichenau datti bleras punts gist ina sper l'autra. Cura che l'artista guarda sut l'emprima punt atras per fotografar la punt dasperas, sa tracti d'in bun mument: In tren passa – e cumpara uschia era sin la fotografia.
-
Bild 1 von 3Legenda: Rosa Lachenmeier fotografescha l'emprima punt. RTR
-
Bild 2 von 3Legenda: Rosa Lachenmeier en acziun. RTR
-
Bild 3 von 3Legenda: Ina bella surpraisa: Il tren cumpara. RTR
A chasa vegn l'artista ad eleger per mintga punt la meglra fotografia e lura surlavurar ella: Far la fotografia nair-alva e lura far in negativ, uschia che las parts cleras daventan stgiras e las stgiras cleras. La finala cumplettescha ella la fotografia cun agens detagls malegiads sezza.
Jau less far surstar la glieud: Ella duess ponderar in mument, avant da pudair identifitgar la punt.
Tar la proxima punt datti puspè ina surpraisa: Sper ina punt veglia sa chatta ina nova che sa numna «Sora Giuvna» ed ha gudagnà il premi «Prix Acier». Per l'artista da Basilea è quella punt il highlight dal di.
-
Bild 1 von 2Legenda: La punt veglia cun sia «Sora Giuvna» èn il highlight dal di per l'artista. RTR
-
Bild 2 von 2Legenda: Rosa Lachenmeier en ses element. RTR
Simbol da colliaziun
I n'è betg l'emprima giada che Rosa Lachenmeier fotografescha punts per in project – quai ha ella gia fatg a New York. Cun il flum Rain ch'ella suonda per il project actual, ha ella ina speziala relaziun, perquai ch'ella è creschida si en la vischinanza dal flum.
Vi da punts la fascinescha che mintga punt è in spievel da ses temp e raquinta er ina atgna istorgia. Ad ella plascha la simbolica ch'ina punt collia glieud, uschia sco l'aua dal flum collia plirs pajais. Mintga tura da Rosa Lachenmeier e Hanspeter Funke d'ina punt a l'autra è ina pitschna aventura: Els vegnan en discurs cun blera glieud ed èn era dependents da l'aura.
Cura che tut las punts da La Punt/Reichenau èn fotografadas datti ina curta pausa en in café – e suenter vai vinavant per lung dal Rain en direcziun Cuira. Rosa Lachenmeier quinta d'avair fotografà tut las punts da la regiun dal flum «Rain» en in onn. Gugent exponiss ella sia lavur en lieus en la vischinanza dal flum, per exempel en il museum d'art a Cuira.