In problem saja l’infrastructura da segirtad e da signalisaziun en tscherts tunnels. La ventilaziun e las sortidas d’urgenza n’adempleschian per exempel betg adina las normas actualas. En intgins lieus stoppian ins era meglierar la protecziun da lavinas e da crappa, scriva l’Astra en ses rapport.
Dals set tunnels ch’i dat sin il tschancun tranter Tusaun e Silvaplauna sajan dus en in stan critic, numnadamain il tunnel Passmal ed il tunnel Solis. I dovria perquai investiziuns a mesa vista, e las lavurs da project han els gia instradà, hai num da vart da l’Astra.
Passa 400 km novas vias naziunalas
En connex cun il Fond per las vias naziunalas ed il traffic en l’aglomeraziun ha la Confederaziun surprais l’entschatta da l’onn passa 400 kilometers vias dals chantuns. En il Grischun sa tracti da la via sur il pass dal Güglia, la N29.
Questas vias èn vegnidas integradas en la rait da las vias naziunalas, e per quella è la Confederaziun responsabla. Ils chantuns da lur vart pajan ina contribuziun en il fond, e sa participeschan uschia vi dal mantegniment da questas vias.
