La bun'ura è il provediment d'aua en la vischnanca da Domat stà interrut dal tuttafatg sin il territori abità, quai da las 06:00 enfin las 09:00, uschia ha declerà Lucas Collenberg, il chanzlist da Domat sin dumonda. La raschun per l'interrupziun saja stada ina lingia rutta en il quartier da Plong Muling. En il decurs da l'avantmezdi ha la vischnanca pudì localisar il stgarp, lura ha la gronda part da la vischnanca puspè gì aua currenta.
Questa notg avain nus survegnì in alarm che la pressiun d'aua saja sa reducida e ch'i haja dà ina ruttadira d'ina lingia d'aua.
La raschun per l'interrupziun n'è betg clera. Cunquai che la lingia rutta sa chattia sut ils binaris da tren èsi pussaivel che la pressiun saja il motiv. Tenor Lucas Collenberg dovria dentant dapli scleriments per eruir ils motivs.
Lavurs vi dals binaris e naginas consequenzas per industria
Durant l'interrupziun è aua culada or sin ils binaris. La Viafier retica ha stuì stabilisar ils binaris ed ha laschà cursar ils trens cun tempo reducì. Vi dals binaris ston vegnir fatgas lavurs da reparatura. L'industria da Domat n'è betg stada pertutgada da l'interrupziun, quella è colliada sur autras lingias d'aua. La producziun da las firmas Hamilton ed Ems Chemie na sajan betg stadas periclitadas, quai han las fatschentas ditg sin dumonda da RTR.
