Aua è ina materia prima impurtanta en Svizra. Era en Grischun gioga l'aua ina rolla impurtanta. Saja quai tar forza idraulica, tut noss flums u las differentas auas mineralas grischunas che vegnan vendidas en buttiglias.
Qualitad d'aua
L'aua da baiver en il Grischun haja ina fitg buna qualitad, di Matthias Beckmann, il chemicher substitut dal Chantun. Mintg’onn vegnan prendidas provas d’aua che vegnan controlladas. L’onn 2021 han ins chattà tar 5,7% da las 527 provas ch'èn vegnidas prendidas ina contaminaziun che surpassa las reglas prescrittas.
Scherms da fecalias
Il problem central en l’aua da baiver grischuna sajan scherms da fecalias. Quels pon vegnir en l’aua tar conflicts d’utilisaziun. Sch'animals da niz vegnan en vischinanza da funtaunas pon quels scherms da fecalias arrivar en il terren ed alura en l’aua. L’inspecturat ha chattà tar la controlla dal 2021 tar 4,2% da las provas ina contaminaziun tras scherms da fecalias. Quai saja en media fitg pauc, dentant è la toleranza tar nulla. Per prevegnir a quest problem saja impurtant da proteger las funtaunas dal muvel ed ultra da quai possian ins installar in indriz da dischinfecziun.
Arsen e Radon
Contaminaziuns cun il metal arsen ed il gas radioactiv radon vegnan avant en tschertas regiuns en il Grischun. Là nua che quest problem è dentant existent, vegn l’aua controllada minuziusamain ed uschia han ins il problem sut controlla. Ins po pia baiver cun buna conscienza aua da spina en il Grischun.
Differenza aua da baiver ed aua minerala
Aua da baiver vegn or da funtaunas u or dad aua da terren. Quai è l'aua che vegn finalmain or da la spina en mintga dachasa. Quella aua è controllada dal provediment dad aua communal ed uschia è la qualitad adina garantida.
Aua minerala vegn or dad ina vetta pli bassa e vegn pumpada profundamain or dal terren. Quai è aua da plievgia ch'è sur plirs onns ida tras il terren ed ha uschia prendì si plirs sals minerals ed acid carbonic.
Tenor Matthias Beckmann na saja betg necessari da cumprar aua minerala. Sch’ins mangia equilibrà e baiva mintga di dus liters aua prend’ins era uschia si avunda minerals. Aua minerala saja uschia plitost in product da giudiment.
