Ils dis da Pasca vegni probablamain nagliur en il Grischun a restar sitg dal tuttafatg, di Jürg Ackermann da SRF Meteo. I dettia dentant grondas differenzas tranter il nord ed il sid dal chantun. En general possian ins dir ch'il nord survegnia dapli sulegl ch'il sid.
Tgi che ha gugent aura bletscha e surtratga duai pia passentar ils dis da Pasca en il sid dal Grischun u en il Tessin.
En il sid dal Grischun restia savens surtratg cun per part plievgia ferma e naiv en ils auts. Il cunfin da naiv sa mova tranter 1'500 e 2'000 meters sur mar. Las temperaturas las pli bassas vegnan spetgadas en il Grischun dal sid. En il Mesauc, la Bregaglia, l'Engiadina Bassa ed en il Puschlav resti per gronda part ferm surtratg cun temperaturas maximalas da 10 grads. En Engiadin'Ota datti maximalmain 4 grads. Cun favugn creschan las temperaturas il pli fitg en il nord dal Grischun.
Tgi che ha gugent aura da primavaira main bletscha va il meglier en la Svizra orientala.
En la regiun da Cuira vegnan spetgadas temperaturas maximalas da 18 fin 21 grads. Grazia al ferm favugn possia era dar periodas suleglivas pli lungas en las regiuns dal nord, sco per exempel la Surselva, la Val dal Rain e la regiun da Silvretta. Quants nivels dal sid che vegnian a vegnir sur las Alps na possian ins anc betg dir.