Fin mesemna en damaun èsi da quintar cun blera plievgia en pliras parts dal Grischun – surtut en las valladas dal sid. En il Mesauc per exempel spetg'ins fin 120 milimeters per meter quadrat.
En la Surselva u en l'Engiadin'Ota èsi da quintar cun fin 60 milimeters plievgia per meter quadrat. En il rest dal chantun, per exempel la regiun da Cuira, dettia bler pli pauc plievgia.
Igl è pussaivel ch'i po dar bovas tras la blera plievgia. Per inundaziuns ves jau in privel pitschen.
I possia schon esser ch'in flum portia blera aua, dentant n'hai ils davos dis betg dà blera plievgia, uschia Felix Blumer da SRF-Meteo. Perquai hajan ils flums er la capacitad per las auas spetgadas.