Sonda a bun'ura hai dà ina vehementa collisiun laterala sin il vial sid da l'autostrada A13, curt suenter il plaz da pussar Apfelwuhr. Quai communitgescha la Polizia chantunala.
In manischunz d’ina auto-rulotta da 43 onns, inclusiv in char annex cun si duas motos, è charrà la sonda enturn las 06:00 cun ina dunna e dus chauns da Sargans en direcziun sid. El è charrà sin il vial dretg. Sin l'autezza da la plazza da pussar Apfelwuhr è in auto da persunas vegnì suenter ad el. Per motivs anc betg sclerids è il manischunz da l’auto da 22 onns cun surpassar collidà cun l'auto-rulotta. Uschia che l'auto-rulotta è vegnida sin il vial da surpassar ed è cupitgada. Sin la saiv da segirezza è l'auto-rulotta lura fermada. Ils dus motos sin il char-annex èn vegnids stgarpads davent ed èn suenter stads ensemen cun bleras toccas d'auto sin via.
Il test dal flad ch’è vegnì fatg cun il manischunz da l’auto è stà positiv. Tut las persunas ed ils animals ch’èn sa participads a l’accident èn restads nunblessads. Vi da tut ils vehichels hai dà in donn total ed els han stuì vegnir runads davent dal post d’accident.
La Polizia chantunala dal Grischun sclerescha la raschun exacta da l’accident. Dal temp da l’accident e da las lavurs da rumida han ins be pudì charrar sin in vial en omaduas direcziuns. Per nettegiar ils vials èn stads en acziun trais collavuraturs da l’Uffizi da construcziun bassa dal Grischun.