Avant 75 onns - Las nodas dal passà – las lavinas dals 20 da schaner 1951

Las vischnancas da Val S. Pieder e Zuoz hai tutgà grevamain, il medem di. Ils 20 da schaner è dapi lura in firà a Val. En omadus vitgs vivan anc oz perditgas da quest trist eveniment: A Val S. Pieder han intgins indigens ed indigenas fatg intervistas cun la glieud veglia e registrà lur istorgias dal di da la catastrofa.

Ed er a Zuoz raquinta in pertutgà, Duri Casty, als «Cuntrasts» (24 da schaner 2021) da la lavina gronda. Co ch’el è vegnì en la lavina, co ch’el ha survivì e tge che quai ha fatg cun el.

L’inschigner forestal pensiunà, Giachem Bott, è stà davent dals onns 80 bunamain dus decennis en la cumissiun da lavinas da Zuoz. El s’interessa fitg per l’istorgia e declera, tge coincidenzas fatalas che han la fin finala manà a la gronda lavina da Zuoz. Plinavant explitgescha Gian Reto Marugg, il schef da la cumissiun da lavinas da Zuoz l'onn 2021, il pli modern sistem da protecziun cunter lavinas. Uschia possian ils abitants da Zuoz sa sentir segirs, di el.

Nagina segirtad da 100%

Era ils abitants e las abitantas da Val S. Pieder èn oz en segirtad. Dentant vegn il responsabel dal chantun per privels natirals l'onn 2021, Gian Claudio Leeger, a la conclusiun ch’i vegnia fatg tut il pussaivel cun paralavinas, rempars, controllas e reparaturas – dentant na dettia «sa chapescha tar la natira nagina segirtad da 100%».

Dal medem avis è er il schef da la cumissiun da lavinas da Val S. Pieder da l'onn 2021, Hannes Tönz: Nus l'avain accumpagnà l'onn 2021 sin sia tura, durant quella el observa la naiv sur il vitg. El aveva ditg che la natira na sa laschia mai dumagnar e perquai haja el adina in grond respect da las lavinas.

Richard Schmid sa regorda

Cura che la lavina da Val S. Pieder è vegnida a val aveva Richard Schmid 26 onns. En in discurs cun Laura Berni Meyer l'onn 2021 descriva el il mument suenter che la lavina è stada giu, e co el è ì ad Uors per clamar agid – quella notg in viadi privlus.