Durant la stagiun da mel ha il Plantahof plazzà 20 masainas d’avieuls a Parpan. L'auta stad eran quai fin a 800'000 avieuls. Avant che l'enviern cumenzia, ha il responsabel dal Plantahof, Thomas Heynemann, transportà questas masainas a Landquart.
Per ch'ils avieuls na sgolian betg davent, sto Thomas Heynemann l'emprim serrar tut las largias vi da las masainas. Questas largias emplenescha el perquai cun gumma-stgima. Sche tut è cumpact e chargià, èn las masainas prontas per il transport. Il nov dachasa sa numna: Landquart. Sin in prà damanaivel dal Plantahof vegnan ils avieuls a passentar l'enviern. Uschia po Thomas Heynemann adina controllar ils avieuls.
Damai ch'ils avieuls pon esser agressivs suenter il transport ch'è in stress, sto Thomas Heynemann trair en ses vestgì. Lura po el laschar liber tut ils avieuls. Quels ston ussa s'endisar vi da la nova cuntrada.
Buna racolta da mel
Pir avant var in mais ha Thomas Heynemann surpiglià sia funcziun sco apicultur responsabel al Plantahof. Sch'el vesa la racolta da mel da ses avieuls a Parpan, èsi stà in bun onn.
Ils avieuls han fatg circa 400 kilos mel a Parpan. Quai è fitg bun.
El haja dumandà ina massa apiculturs da differentas regiuns en il Grischun, e tar tuts vesia quai ora circa tuttina sco ils ultims onns. Il chantun Grischun è dentant grond, betg dapertut è l'aura tuttina. Quai munta che la racolta po variar ferm tut tenor regiun.
L'apicultura è fitg dependenta da l'aura, la lavur dependa dal ciclus da la natira. I dovra sulegl per ch'ils avieuls sgolan insumma, mo i dovra era plievgia per che las flurs produceschan nectar.
Il pli gugent han ins sco apicultur ch'i plova la notg e ch'igl è bel durant il di. Quai n'è displaschaivlamain quasi mai il cas.
L'emprima mesadad da la stad n'è betg stada ideala en il Grischun. Temperaturas plitost frestgas cun paucs dis chauds e suleglivs. Quels hai dà il fanadur e l'avust. Lura han ils avieuls pudì esser activs e sgular ora en las planiras. Pia in'emprima mesadad plitost bletscha e fraida ed ina fitg bella segunda mesadad da la stad. Ideal per ils avieuls fissi dentant, sch'ils dis da bell'aura e da plievgia sa midassan pli savens. Lura avessi era dà dapli mel d'avieuls.
Sch'i plova pliras emnas, poi esser ch'ils avieuls dovran sezs lur provisiun da mel, e ch'i na resta nagin mel per las consumentas ed ils consuments. E tenor l'expert ha l'aura in'influenza mo sin la quantitad, e betg sin la consistenza u er na sin il gust dal mel d'avieuls. Gliez haja mo da far cun la stagiun da la racolta.
Or da l'archiv – la lavur cun avieuls l'onn 1982
