A Cuira vegn bajegià. Uschia è il dumber d'abitaziuns creschì ad in crescher. Pli e pli taissa è la curva – fin ch'ella è splattada l'onn passà.
Ma er sch'il dumber d'abitaziuns crescha na vul quai betg dir ch'i vegnia pli simpel da chattar in'abitaziun. Mintga onn, il prim da zercladur, vegnan dumbradas las abitaziuns libras, per l'Uffizi federal da statistica. Cumpareglià cun tut las abitaziuns è la cumpart d'abitaziuns libras constant sin in livel bas.
Per giuditgar la situaziun datti l'index d'abitaziuns libras. Quel mussa tge cumpart procentuala da las abitaziuns ch'èn libras. Qua na vegn dentant betg differenzià tranter abitaziuns affittadas e da proprietad.
Pli baud vivevan dapli persunas en in'abitaziun. En Svizra abitavan anc l'onn 1970 en media 2,9 persunas en in'abitaziun. L'onn 2021 be pli 2,2. I dovra pia pli bleras abitaziuns per tuttina blera glieud.
Ed il svilup dals pretschs? Las cifras mussan che las abitaziuns vegnan pli charas. Fertant che 50% da las abitaziuns custavan 2013 damain che 1'680 francs, è quest cunfin creschì sin 1'775 francs la fin da l'onn 2023. Il Mars 2018 custavan be 50% da las abitaziuns dapli che 1'600 francs, il december 2023 èn quai 70%.
