La Banca Chantunala Grischuna BCG è involvida en il bancrut enturn l’interprendider austriac René Benko. Ina retschertga externa duess stgaffir clerezza ed examinar la rolla da la BCG sco er da ses president Peter Fanconi.
Ma uss vegn ora: La firma da cussegliaziun Ernst & Young, ch’è vegnida incumbensada cun l’inquisiziun, è il medem mument dapi il 2008 il post da revisiun da la BCG. Ina rolla dubla che procura per dira critica.
L’expert dal dretg da bancas Peter V. Kunz da l’universitad da Berna è cleramain da l’opiniun: «Quai na po gnanc esser independent. Ina tscherna pli mala per ina retschertga independenta n’è strusch pussaivla.»
Nus dubitain ferm che quai giaja independentamain.
Ernst & Young fa sco post da revisiun gia lavurs per la BCG. «Ultra da quai survegn la firma blers daners per l’activitad da revisiun. Sche Ernst & Young sto verifitgar criticamain insatge supplementar vegn dumandà tar la publicaziun dals resultats: Quant critic po quai esser?», cuntinuescha Kunz.
Il mument nagina decleraziun da la Banca Chantunala Grischuna
Critica envers l’inquisiziun datti era da la PPS grischuna. La partida ha inoltrà ina dumonda per la sessiun da l’emna proxima. Walter Grass, schef da fracziun en il parlament chantunal, di: «Nus dubitain ferm che quai è propi independent.» La regenza duai tranter auter respunder sch’ella fiss pronta da dar eventualmain ina examinaziun externa.
La BCG na vul per il mument betg s'exprimer davart tut ils eveniments. Sin dumonda dal schurnal regiunal Grischun da Radio SRF scriva la banca: «Nus s'exprimin uschespert ch'il rapport d'examinaziun è avant maun.» Cura che quai vegnia ad esser, saja grev da stimar. Ernst & Young adempleschia las directivas legalas e dal dretg statal davart l'independenza, uschia la BCG vinavant.
Credit da passa 60 milliuns francs
La Banca Chantunala Grischuna è sin ina glista da crediturs enturn il bancrut da l'investider René Benko, quai tenor rapports da medias. Il credit pussaivel per la gruppa da Benko Signa è inditgà sin questa glista cun radund 60 milliuns francs. Ultra da quai duai resultar da mails dal president da la BCG, Peter Fanconi, che quest ha survegnì avantatgs perquai ch’el duai avair gidà Benko indirectamain a dar credits tar autras bancas chantunalas.
René Benko ha il mars annunzià insolvenza privata. Al bancrut da l'imperi da Benko èn era pertutgadas numerusas firmas svizras. En tut duai la gruppa da Signa avair debits da var tschintg milliardas.
