La Banca Chantunala Grischuna ha preschentà sia nova halla da clientella a Cuira. Cunquai ch'ils basegns da la clientella saja sa midada durant ils ultims onns ed ils affars da banca simpels vegnan adina pli savens fatgs sur ils chanals electronics ed era las transacziuns cun daner contant sa reduceschan marcantamain haja la banca reagì, sco els scrivan en lur communicaziun.
La clientella che visita ina filiala fa quai sapientivamain per pudair laschar cussegliar persunalmain. Ils ultims onns saja perquai sper la nova halla da clientella a la Plazza da la Posta era tut las autras sedias regiunalas vegnidas renovadas.
Nagina centralisaziun
Era sche la banca ha serrà ils davos onns pliras filialas, sco per exempel en l'Engiadina Bassa, na saja quai nagina centralisaziun. Tenor il CEO Daniel Fust èn questas filialas cunzunt vegnidas serradas pervi dals temps d'avertura limitads. Sco el ha ditg envers RTR metta la banca gronda paisa sin la preschientscha regiunala. Perquai haja la banca era gist renovà 10 sedias regiunalas.
Concept da Rolf Sachs
Il concept da la nova halla vegn da l’artist e designer Rolf Sachs. Cor da la halla nova è ina tur da lain che ha la funcziun dal retschaviment. Cun tals elements vul Rolf Sachs dar il sentiment d’esser unics. L’entir midament custa radund 8 milliuns francs.
Or da l'archiv
