Ils 3 da zercladur ha cumenzà la stagiun dals bancs da lectura a Cuira. Igl è il 12avel onn che la biblioteca da la citad da Cuira emplaina las chistas da metal sin ils set bancs ch'èn derasads en l'entira citad.
La finamira da l'acziun è d'inspirar ils osps da la citad, ma er da render attent sin las bibliotecas a Cuira. Las chistas da metal protegian cunter donns d'aura. Cunter enguladitschs na datti dentant nagina protecziun. Il sistem funcziuna a basa da fidonza. Ils emprims onns ha quai funcziunà fitg bain. Ils ultims onns hajan ins però observà cha adina dapli cudeschs mancan.
Quest onn è la bilantscha uschè mala sco anc mai. Aifer 10 dis è la maioritad dals cudeschs svanida. Ina chaussa fitg frustranta per Julia Wäger e ses team. Wäger è l'inizianta dal project e manadra da la biblioteca da la citad da Cuira.
Nus essan propi consternads. Aifer in'emna è la maioritad da noss cudeschs svanida.
In'autra sfida per las bibliotecaras ed ils bibliotecars è la schurma da cudeschs esters che vegnan messa en las chistas. Er sche quest'ovra saja en blers cas manegiada bain, dettia quai dapli lavur ad ella e ses team. Cudeschs vegls che la glieud na vul betg bittar davent sezza ston a la fin vegnir allontanads da las bibliotecas.
Per nus èsi fitg impurtant da porscher cudeschs bels e novs per render attent sin la purschida da las bibliotecas. Ils bancs da lectura n'èn betg in lieu per donaziuns da cudeschs duvrads.
Actualmain èsi anc adina planisà da cuntinuar cun il project. Engrondir la purschida èn dapli lieus n'è il mument anc betg pussibel. Ins vul en emprima lingia optimar la signalisaziun e las instrucziuns en ils lieus actuals per reducir il maldiever en l'avegnir.
Il project «banc da lectura» vegn planisà e realisà en collavuraziun tranter la biblioteca da la citad da Cuira, la planisaziun dal spazi liber da la citad da Cuira e la Biblioteca chantunala dal Grischun. Sustegnì vegn il project da sponsurs e da las librarias da Cuira che furneschan gratuitamain medias actualas.