En ina collavuraziun dal Plantahof cun la Georgia duai il standard svizzer d'agricultura vegnir scolà. Per quest intent èn set studentas e students durant las proximas duas emnas en il Grischun. Bleras visitas duain dar ad els invista en ils differents manaschis purils.
Igl è l'emprima giada ch'i dat ina tala visita, cunquai che la scolaziun che cuzza dus onns è nova. Tranter ils students e las studentas da la Georgia è era Lela Arabuli. Ella vul daventar tecnologa en la producziun da latg. Gist la visita en ina stalla da chauras a Cuira haja purtà ad ella blera nova savida:
Jau vuless avair in bain cun chauras ed era producir chaschiel-chaura en la Georgia. La visita qua dat a mai fitg blera savida che jau vegn ad applitgar a chasa.
La finamira da la scola è ch'ils students e las studentas survegnan ina survista e san applitgar pli tard uschè bler sco pussaivel per lur manaschis en lur patria.
Sch'els vesan co l'agricultura funcziuna en Svizra ed els vegnan d'applitgar bler en lur patria, alura è quai in grond gudogn per tuttas e tuts.
Suenter las visitas lavuran las studentas ed ils students in pèr dis sin in bain puril grischun. Ils barats duain rinforzar la collavuraziun entaifer las puras ed ils purs.
