En il guaud sur Churwalden ha questa Tschuncaisma lieu il champ dals Battasendas Grischun. Il davos champ è – causa il coronavirus – stà avant trais onns. Nairas uras damai per in inscunter da tut las secziuns grischunas. En tut èn radund 250 battasendas da 10 secziuns arrivads la sonda avantmezdi sin il prà «In da Steina». Suenter metter si las tendas, ha il suentermezdi lura gì lieu la festa d'avertura dal champ cun il motto «Asterix festivescha anniversari». Organisà il champ tradiziunal ha quest onn la secziun da Domat «Amedes» che festivescha quest onn era gist ses 50avel anniversari.
Sin il program stattan cursas da posts, in teater sco era blers differents gieus. Tenor Luna Weggler, che fa part dal comité d'organisaziun dal champ da Tschuncaisma 2022, saja suenter ils davos dus onns cun online-battasendas il gust da puspè vegnir ensemen e passentar temp cuminaivel en la gronda runda enorm grond. Persuenter saja era il squitsch dad avair organisà in bun champ pli grond.
La sfida da chattar in plaz adattà
Da chattar in plaz adattà per tantas persunas daventia adina pli grev. Era per il champ da Tschuncaismas hajan els stuì dumandar da Maiavilla fin a Razén per chattar la fin finala in plaz a Churwalden. Luna Weggler audia er adina puspè dad autras secziuns che hajan fadia da chattar in plaz per lur champ. Cumpareglià cun auters chantuns da la Svizra haja dentant en il Grischun anc bler plaz. Perquai vegnian er adina dapli battasendas da la bassa en il Grischun per lur champs. Per il futur saja impurtant da cumenzar avunda baud cun la tschertga dad in plaz e restar flexibel. Insaco giaja adina.
