Tenor l'iniziant dal project, Michael Jörg, mettan las uniuns per l'ambient oravant tut sin la tactica da retardament. Quella tactica fa vegnir malsegir investiders uschia ch’els na sa participeschan betg e tschertgan projects nua ch'il cuntravent è pli pitschen e la realisaziun pli realistica.
En vischinanza dal project previs passa era la Viafier retica, in traject sut patrimoni mundial da l’UNESCO. L’uffizi da cultura da la Confederaziun ha infurmà ch’ins stoppia analisar las consequenzas dad in tal project en vischinanza dad in patrimoni mundial.
Tschertgar investiders per il project da 180 milliuns
Cun tut ils obstachels actuals è l’iniziant Jörg en tschertga dad investiders per finanziar il project sin il pass dal Bernina che vegn a custar radund 180 milliuns francs. La Confederaziun sa participass cun 60% als custs. La Repower, ch’ha la sedia a Poschiavo, è però sa retratga dal project. Il concern d’energia vul sa concentrar sin auters projects. La finamira resta d’inoltrar il project enfin la fin da quest’onn.
Populaziun di Gea a «BerninaSolar»
Il suveran da Poschiavo ha decis dumengia cun 585 cunter 506 da dar ils dretgs da terren ch’èn necessaris per realisar il project sin 2’200 meters sur mar, nua ch’il runal Motta Blanca era ina giada.
Schanza per vischnanca?
Il dar a tschains il terren sin il pass en dretg da construcziun, signifitgass entradas d’almain 600’000 francs per onn en la cassa communala, quai rapporta RSI. Las consequenzas per l’ambient evocheschan dentant er preoccupaziun tar la populaziun da Poschiavo. Las entradas pudessan dentant er gidar la vischnanca a pajar investiziuns che spetgan ils proxims onns.
Nus na pudain betg emblidar las grondas sfidas che spetgan la vischnanca ils proxims onns. Ina veglia chasa da scola, l’infrastructura da sanadad u er las vias èn be in pèr exempels nua ch’i vul raps il proxim temp.
Tenor ils manaders dal project «Bernina Solar» saja la regiun sin il Pass dal Bernina ideala per in project d’impurtanza naziunala.
«BerninaSolar»
Sin in’autezza da 2’200 meters sur mar, là nua ch’il runal Motta Blanca era ina giada, duai il parc solar «BerninaSolar» vegnir realisà. El duess furnir energia per 20’000 chasas d’ina famiglia. Il lieu saja in dals megliers en Svizra areguard la radiaziun dal sulegl, ha declerà Michael Jörg, il manader dal project envers RSI. Ultra da quai saja la vischinanza cun la via chantunala e lingias d’auta tensiun d’avantatg e fetschia vegnir il lieu per in parc solar anc pli attractiv.
Igl è in territori che vegn duvrà ferm. I dat differentas rutas da bike ed il terren vegn er utilisà per l’agricultura. Nus n’essan pia betg en ina cuntrada selvadia, mabain en ina cuntrada che vegn nizzegiada gia uss sco infrastructura.
