Il Grischun è pertutgà pli fitg da las cugliunarias da la Auto da Posta SA che pensà. Il rapport publitgà mussa che gudogns da passa 30 milliuns francs èn vegnids zuppads durant ils onns 2007 enfin 2015. Il cusseglier guvernativ Mario Cavigelli è surprais da la dimensiun dal scandal e pretenda ussa mesiras.
I saja anc adina grev da giuditgar il donn che las cugliunarias da cudeschaziuns hajan chaschunà al Grischun. Cler saja dentant ch'il donn saja pli gronds che quai ch'ins haja anc pensà il favrer, cura che l'entira affera è vegnida a la glisch, di Cavigelli. La cifra da 1,5 enfin 2 milliuns francs na saja perquai betg pli actuala. El spetgia ina restituziun da maximal 10 milliuns francs.
Chantun aveva resalvas
Mario Cavigelli conceda che la controlla da finanzas dal chantun Grischun haja pliras giadas annunzià resalvas pertutgond las calculaziuns da pretsch da la Auto da Post SA. Quai hajan els era laschà savair l’Uffizi federal da traffic. Mo els n’hajan betg dastgà prender invista ellas actas. Ch'els sez avessan stuì insister pli fitg sin transparenza tar ils custs na lai Cavigelli betg valair.
Consequenzas stoppia dentant dar tar l’Uffizi federal da traffic pretenda el. Lez sajan stads datiers da la Auto da Posta SA. Mo era tar ils chantuns vesa el basegn per mesiras e correcturas, agiunta Mario Cavigelli.
RR novitads 17:00