Siglir tar il cuntegn
Inhalt

Grischun Betg mo in viadi virtual, mabain era al WEF

En il rom dal project «Challenge Rumantsch» èn vegnids preschentads quatter projects per cultivar e promover il rumantsch. Persvadì la giuria a l’ETH da Turitg han dus projects: Per l’ina il «Teddy Tutor» ed il project «Da Val a Val». Quai scriva la gasetta «Südostschweiz».

Legende: Video «Challange Rumantsch» abspielen. Laufzeit 04:22 Minuten.
Or da Telesguard dals 24.11.2017.

L'idea dal project «Challenge Rumantsch» è stada da promover la lingua e la cultura rumantscha da maniera termaglianta. Per cuntanscher quai èn 15 scolars da la Scola chantunala sa mess ensemen cun students ed experts da la scola politecnica ETH. Communablamain han ils participants en las ultimas quatter emnas tschertgà ideas e sviluppà prototips.

Promover cun lingua e da mangiar

Ed ils resultats ch'ils participants han preschentà la gievgia en la scola politecnica a Turitg èn en mintga cas innovativs. Persvadì la giuria han cunzunt dus dals quatter projects preschentads. D'ina vart in urset che po manar discurs simpels cun uffants en tut ils idioms rumantschs. Plinavant eruescha l'urset il nivel linguistic da l'uffant e s'adattescha a quel.

Dentant unescha betg mo lingua, mabain era mangiar. E da questa realitad vul il project da «Da Val a Val» profitar. In «Food Truck» che duai sa fermar davant universitads, open airs e festivals da mangiar. Cunzunt en lieus nua ch'i ha Rumantschs che han bandunà la patria. La finamira è dentant betg mo da svegliar regurdientschas en ils cors rumantschs cun las spezialitads grischunas, mabain era da far ina spassegiada virtuala tras las vals rumantschas. Ins metta damai si egliers e viandescha tras las pli differentas cuntradas. Sin viadi inscuntran ins lura l'in u l'auter Rumantsch che raquinta in'istorgina da sia regiun – en ses agen idiom sa chapescha.

In public pli vast

La giuria han quests dus projects damai persvadì. Uschia han ils sviluppaders acquistà in bigliet per il Forum mundial d'economia WEF. Sch'els pon era persvader quest public vegn a sa mussar.

RR novitads 08:00