15 vischnancas èn tenor l'Uffizi federal per statistica anc da lingua rumantscha – 10 en Surselva e 5 en Engiadina/Val Müstair. Cun quai na datti – silmain tenor quella statistica – betg pli vischnancas sutsilvanas u surmiranas. Sco ch'il Uffizi scriva vivan en Surses e Muntogna da Schons danovamain dapli persunas cun tudestg sco lingua principala. Il motiv na saja betg, ch'i dat pli paucs rumantschs en quels lieus.
Sin la lingua uffiziala u la lingua da scola da las vischnancas n'ha la statistica nagina influenza.
Naginas consequenzas per Surses
Per Leo Thomann, il president communal da Surses saja il resultat da l’Uffizi federal da statistica stà ina surpraisa. El haja gì da tadlar duas giadas, cura ch’el haja sentì la novitad en il radio. Per el è il cas cler: Il tudestg è mo uschè ferm en la statistica, perquai che l’enquista da linguas dumbra era persunas rumantschas sco persunas tudestgas. Tenor l’enquista da structura èsi numnadamain pussaivel, da menziunar pliras linguas sco lingua principala.
Thomann na crai betg che la nova enquista haja ina consequenza per la vischnanca da Surses. Il mument na crai el betg che la nova constituziun che vegnia il mument revedida, vegnia adattada pervi da la nova publicaziun da la confederaziun. Era per la lingua da scola n’haja la nova statistica nagina influenza.
Ina surpraisa per la Muntogna da Schons
Ina surpraisa è la statistica era per la vischnanca da la Muntogna da Schons. Marco Dolf, il president communal ha ditg, ch’el n’haja betg cartì ch’i vegnia uschè lunsch, ma sco para saja quai ussa uschia. Tge che la nova statistica da la Confederaziun muntia ussa na possia el per il mument betg dir, el stoppia evaluar quella. Ch’i dessi consequenzas per la Muntogna da Schons na quintia el però betg.
Motiv per midada: dapli da lingua tudestga
Raschun per la midada da las duas vischnancas na saja dentant betg che pli paucas persunas discurrian rumantsch, scriva il BFS. Il dumber da persunas che discurran rumantsch saja dapi decennis stabil tar radund 40'000 persunas en Svizra. 60% da quellas vivan en il Grischun, dus terzs da quellas – radund 16'000 – en vischnancas rumantschas.
Creschida è dentant la cumpart da persunas che discurran tudestg e vivan en il territori tradiziunal rumantsch. Quest trend exista dapi il 19avel tschientaner, enturn il 1888 èn la Tumleastga e San Murezzan vegnids tudestgs, en la segunda mesadad dal 20avel tschientaner s'è quest svilup intensivà.