La biblioteca da la citad da Cuira para d'esser stada sonda passada, ils 26 d'avust 2023, in toc pli plaina che autras sondas. Ils balluns cotschens en e davant la biblioteca tradeschan il motiv. Quest lieu d'entupada per amaturas ed amaturs da cudeschs ha festivà ses 5avel giubileum.
Il team da la biblioteca ha preparà in vast program per celebrar. E las persunas che lavuran là, paran d'avair grond tschaffen, e quai betg mo durant il di da festa. Ellas stiman che lur lavur ha tanta variaziun, il contact cun giuven e vegl che vegn en biblioteca per emprestar cudeschs, gieus e visitar las differentas occurrenzas che han lieu tut onn. Ed ellas en loschas sin projects sco «lingua simpla» che fa accessibel la lingua tudestga a persunas tgi èn pir vid emprender quel linguatg.
Er las visitadras ed ils visitaders collian la biblioteca moderna cun ina massa bunas experientschas.
La biblioteca da la citad è per mai sco ina stiva. Jau stim fitg che jau poss vegnir er ordaifer ils temps d'avertura.
Tranter ils giasts giuvens e vegls hai betg mo magliacudeschs, mabain er da quellas e quels che dattan gugent in gieu. In mantun da tals è preparà en la part davos da la biblioteca. Tranter auter er ina pitschna maisa da roulette.
In auter punct culminant dal program da giubileum ha lieu sin l'avantporta da la biblioteca. Là ha il coiffeur da Minca, Danny Beuerbach, rasà or ses tarpun cotschen cun musters orientals e taglia chavels per nagut sch'ins legia avant ad el or d'in cudesch.
Cun ses project «BOOK A LOOK _ and read my book» vuless l'um cun ils chavels tschurs promover il plaschair vi dal leger e la fidanza en sasez.
Las aspectaturas ed ils aspectaturs ch'èn sa rimnads enturn il tarpun, gizzan las ureglias per tadlar l'istorgia che la matta giuvna, che survegn gist ina nova frisura, prelegia. En il public è er Julia Wäger, la manadra da la biblioteca da la citad da Cuira.
Sper ils bels inscunters e resuns da visitadras e visitaders è il suandant restà ad ella il pli fitg en regurdientscha, sch'ella guarda enavos sin ils ultims 5 onns.
Che nus avain survegnì uschia ina resonanza positiva cun noss concept da la «Open Library». Igl è stà grondius che nus avain savì realisar quest project sco pionieras. E che tantas autras bibliotecas svizras èn stadas e visitar nus per evaluar sche quai è er adattà per ellas.
Er per il futur pensa ella che las ideas per novs projects vegnan betg ad esser stgarsas. Il pli grond giavisch fiss d'avair dapli plaz, ma quai vegna ad esser ina visiun a pli lunga vista. L'emprim valì da giudair la festa da giubileum. E quai – sper il guardar dal bainstar dals giasts – cun incumbensas in pau pli nun-usitadas che uschiglio – sco scuflar si balluns ed emplenir si las liongias per ils hot dogs, manegia la dunna blonda cun in surrir.
