Entant datti set differentas bieras puschlavinas. Da cler fin al gust da Nadal. La bieraria pitschna a Poschiavo producescha dapi tschintg onns si'atgna biera artisanala – sche pussaivel cun products indigens.
En connex cun la premiaziun da «la Regione Svizzera del Gusto 2024», ch'è quest onn la Valposchiavo, è la biera da la «Birraria Valposchiavo» vegnida tschernida sco «il product dal mais d'october». Nus n'enconuschain anc betg questa biera e quai ans ha dà motiv da scuvrir ina giada questa bieraria.
Ils indigens èn la meglra referenza. Els ans pon dar il feedback direct. Nus prendain serius quel e pudain reagir sin quai e meglierar nossa biera.
Biera surtut per ils indigens
Davide Mutti è il maister bierer e creescha las differentas bieras. Sche pussaivel dovra el ingredienzas indigenas. En ina squadra da trais vegn producida la biera e vendida en la val ed en l'Engiadina. Els produceschan dapi tschintg onns biera. Cumenzà han els durant la crisa da Covid, quai ch'è stà difficil per la squadra. Tuttina han els fatg vinavant. En l'avegnir vulan els segir crescher, ma be moderà, perquai ch'els vulan era restar unics.