A Cuira datti a partir dad oz, glindesdi, la pussaivladad d'emprestar velos. Il chantun Grischun ha lantschà ensemen cun Pro Velo Grischun ina rait cun 10 staziuns e 60 velos ed e-bikes a Cuira. Gestiunà vegn il «bikesharing» da la firma Publibike SA en collavuraziun cun la fundaziun Feschtland a Cuira ch'è responsabla per il mantegniment dals velos e per la logistica.
Emprestar cun il telefonin
Sper il chantun sustegnan er la Scola auta spezialisada dal Grischun, la Scola auta da pedagogia dal Grischun, l'Ospital chantunal sco er la citad da Cuira la finanziaziun d'ina staziun da parter velos en la citad. Emprestar pon ins ils velos sur l'app «PubliBike» u sur il Swisspass. Las collavuraturas ed ils collavuraturs dals partenaris pon duvrar ils velos gratuitamain per 30 minutas.
Nov mais manaschi da test
En bleras autras citads svizras datti gia offertas sumegliantas. A Cuira duai il nov sistem vegnir testà per nov mais. Sch'il manaschi da test ha success, duai la rait vegnir extendida ed ulteriuras staziuns en las aglomeraziuns vegnir integradas en il servetsch permanent, uschia il chantun.
