Var trais mais suenter l'avertura da la stanza da consum che l'Uniun Agid per surviver (UHG) maina, tira la citad da Cuira ina bilantscha positiva. La purschida cumenza a s'etablir en la gruppa avisada ed il dumber da persunas che nizzegian la stanza ubain er il post da consultaziun crescha cuntinuadamain.
I sa mussa plaunsieu era in effect da dischlocaziun, davent dal Stadtpark ed en direcziun da las localitads – sco giavischà da las autoritads. I dat dentant anc adina sfidas en il spazi public.
Dumonda pli auta che spetgada
Dapi l'avertura il prim d'avrigl 2026 èn var 90 persunas sa registradas, quai ha surpassà las aspectativas da la citad. La stanza da consum per persunas cun malsogna da dependenza vegn duvrada da radund 30 persunas cun 100 consumaziuns per di. Quella cifra è restada dapi il cumenzament sin in nivel stabil cun in trend d'in lev augment.
Ma era las autras purschidas da l'uniun – la cussegliaziun, l'igiena sco era l'alimentaziun – vegnan duvradas regularmain. Uschia è s'etablì in lieu da s'entupar fidaivel per persunas ch'èn pertutgadas da dependenza.
Era la polizia è cuntenta
La polizia da la citad da Cuira è cuntenta cun la situaziun da la stanza da consum. La situaziun saja stabila e controllada. La purschida cumenzia a s'etablir en la scena e l'effect da direcziun vers il lieu en il Seilerbahnweg 7 sa mussia pli e pli.
Durant ils temps da manaschi n'haja dà nagins eveniments relevants per la segirezza. Ma la polizia observia la situaziun stretgamain e accumpognia tut tenor basegn cun mesiras supplementaras.
La polizia da Cuira aveva ils ultims onns constatà in augment annual da var 5 persunas che vegnan dependentas. Tenor il cumandant da la polizia da la citad da Cuira saja quest augment dad attribuir a l'attractivitad da Cuira sco lieu da consum. Quai veglian ins uss cumbatter cun il local da consum e dapli preschientscha da la polizia – uschia spera el che Cuira daventia pli pauc attractiv.
Sfidas restan en il spazi public
Malgrà il svilup positiv existan sco spetgà anc adina sfidas cun consumaziun en il spazi public. En spezial da bun'aura consumeschan persunas malsaunas da dependenza per part vinavant en il spazi public surtut en il sectur dal Stadtpark. Ma quests svilups correspundan a las experientschas da purschidas cumparegliablas. Midadas da cumportament en la scena succedan tenor experientscha pass per pass e dovran temp.
In focus sin stabilitad e svilup
Las proximas emnas resta il focus sin in manaschi stabil e da la promoziun sistematica da las purschidas existentas.
Finamiras restan la stabilisaziun da la situaziun da viver da persunas cun malsogna da dependenza, ina distgargia persistenta dal spazi public sco er la garanzia da la segirezza en il quartier.
L'effect da la purschida vegn evaluà sistematicamain da vart externa. In rapport vegn ad esser avant maun fin la stad 2027. Quel vegn ad esser ina basa da decisiun fundada per la concepziun e finanziaziun a partir da l'onn 2029.