Il mund sa revegn puspè dal coronavirus. Schegea ch’i va be plaunsieu ord la crisa, sentan era ils biros da viadi in lev augment. Rosmarie Cavigelli, dal biro da vacanzas «Buna luna» ad Igis registrescha dapi l’emna passada puspè novas reservaziuns.
Il mument datti enturn 3 novas reservaziuns per emna.
Tuttina na sajan questas cifras betg da cumparegliar cun l’onn avant, cura ch’ella haja gì tantas reservaziuns entaifer in di. Tar las novas cudeschaziuns sa tractia da glieud che vul far vacanzas en ils pajais vischins sco l’Italia, la Frantscha u la Germania ch’han avert lur cunfins avant in'emna. Per vacanzas nua ch’igl è da sgular èn las reservaziuns anc stgarsas.
Ils clients s'infurmeschan
Renate Reinbacher dal biro da viadi «ATR Tours» a Scuol vesa quai sumegliant. I dat minim dapli reservaziuns per ils pajais vischins. Enturn duas fin trais novas reservaziuns per emna. Ella ha era gia survegnì puspè dumondas per l’Egipta, dentant haja ella stuì declerar als clients ch’ils cunfins sajan là anc serrads.
Stuschar enstagl d'annullar
Petra Moser da «Bolero Reisen» senta medemamain mo in pittschen augment. Quai ch’è dentant legraivel è ch’ils clients n’annulleschian betg cumplettamain las vacanzas, mabain stauschian ellas sin in u dus mais pli tard. Quai pertutga per exempel vacanzas per la Spagna u la Grezia ch’han gist avert u avran proximamain lur cunfins.