L'emna passada ha la Confederaziun avertì. Blers alloschis d'asil da chantuns e Confederaziun sajan gia dapi mais emplenids. Fin la fin da l'onn vegn quintà cun fin 30'000 ulteriuras dumondas d'asil uschia ch'i pudess vegnir stretg. Perquai dumonda il Cussegl federal il parlament per in credit da 133 milliuns francs per alloschis d'asil temporars.
Ruassaivel è Peter Peyer, il cusseglier guvernativ responsabel dal Grischun. Il Grischun saja pront per dapli dumondas d'asil. Actualmain sajan ils alloschis d'asil occupads per radund 50% fin 60%, ins haja pia anc reservas. Quai haja er da far cun il sistem dal chantun che sa differenziescha da quel d'auters chantuns.
Jau crai che nus essan, stan oz, pronts per las incumbensas che nus avain. Nus avain alloschis per quellas persunas che vegnan partidas tiers a nus.
Il Grischun na repartia numnadamain betg requirentas e requirents d'asil sin las vischnancas, mabain dettia suttetg en alloschis collectivs. Quai portia dapli flexibilitad ed er ils process sajan pli simpels. Per pudair restar flexibel è il chantun dentant er adina a la tschertga d'alloschis adattads sco per exempel chasas per champs u hotels.
Nus alloschain la glieud a moda collectiva, uschia èsi pli simpel d'accumpagnar ella a moda adequata. Gist en situaziuns sco uss, cura ch'igl è pussaivel che blera glieud vegn en Svizra, è quai in detg bun sistem ch'è er flexibel.
Sper quai è il chantun actualmain er a la tschertga da persunal che sustegna ed accumpogna requirentas e requirents d'asil. Quai saja bain ina sfida, dentant er qua vegnian ins da cuvrir ils basegns. Pia er sch'i avess propi da vegnir uschè bleras persunas che dumondan per asil en Svizra sco quintà è Peter Peyer optimistic ch'il chantun è pront da dar alloschi a quels che vegnan lura en il Grischun.
