Las temperaturas la fin da zercladur èn bassas. Quai sentan uss er ils bogns averts en il Grischun. Il bogn avert a Glion ha bler pli paucs giasts ch'avant in onn. Per il manader da gestiun Aziz Cheikh saja quai problematic – surtut perquai ch'ils emprims mais da la stad èn impurtants per vender bigliets da stagiun.
Il zercladur da l'onn passà avain nus gì 12'600 giasts. Quest onn eran quai cnap 3'000. Quai èn 9'000 persunas pli pauc.
Ina sumeglianta experientscha fa era Mario Duschen, manader dal bogn avert Trü a Scuol. El na fetschia betg propi tants quitads, ma er el sentia las consequenzas da las temperaturas bassas. Be in terz dals giasts spetgads sajan vegnids fin ussa.
El haja era gia empruvà bleras chaussas per meglierar la situaziun, di Mario Duschen. Avrir pli baud il bogn avert, laschar avert il bogn pli ditg ed anc dapli.
Nus vivain da quellas persunas che vegnan, sch'igl è propi chaud [...]. Quellas mancan ussa.
A Tusaun na vesi betg or auter. Il manader da gestiun dal bogn avert Tusaun, Sven Eppler, numna l'entschatta da la stagiun «trista». Er els hajan bler pli paucs visitaders e pli paucas visitadras che l'onn passà. Er tar las cartas da stagiun senta el che bler pli paucas persunas hajan cumprà ina.
Ins na possia betg influenzar grondamain la situaziun, dian ils trais manaders. L'unic ch'els pon propi far, è simplamain da sperar: sperar ch'i vegnia pli chaud e ch'il sulegl sa laschia vesair dapli.