Tenor la statistica da TikTok èn en ils ultims 12 mais vegnids chargiads sin la plattafurma passa 21'000 videos cun il hashtag «booktok». Sper quai èn videos cun quest hashtag vegnids guardads radund 291 milliuns giadas. En quels videos vegnan preschentads, prelegids u era simplamain cumprads cudeschs. Sper quai datti er adina puspè tips sco ch'ins po chattar la motivaziun per leger. Ils cudeschs ch'èn actualmain en il trend, èn ils cudeschs da:
- dark romance – istorgias d'amur cun scenas da sex fitg detagliadas,
- new adult – istorgias d'amur pli toxicas e realas e betg memia «kitschigas» e
- mafia – istorgias d'amur ch'han in connex cun la mafia e per ordinari violenza.
BookTok influencescha las glistas da bestsellers
Dapi l'avrigl 2023 datti ina glista uffiziala da bestseller da «BookTok». Quella cumpara mintga mais ed è enconuschenta sin l'entir mund. En librarias datti ozendi perfin la sparta «BookTok» nua ch'ins chatta ils cudeschs ch'èn actualmain il pli viral sin TikTok. In bun exempel per l'influenza da TikTok sin la vendita da cudeschs è l'autura americana Colleen Hoover. Il hashtag #colleenhoover ha gì passa 4 milliardas clics sin la plattafurma sociala. L'emprim cudesch dad ella è cumparì il 2016, da quel temp ha ella vendì totalmain 237'000 exemplars en ils Stadis Unids. Tras TikTok ha il medem cudesch anc ina giada survegnì in hype ed è vegnì vendì il 2022 8,6 milliuns giadas en ils Stadis Unids da l'America. En tut ha Colleen Hoover vendì l'onn 2022 passa 20 milliuns cudeschs ed è uschia era sin las glistas tradiziunalas da bestsellers.
La biblioteca na bada betg dapli clientella
Per la manadra da la biblioteca da la citad da Cuira n'ha il trend da TikTok betg ina gronda influenza sin la clientella. Els na badan betg che dapli giuvens e giuvnas veglian leger. Tuttina sa drizzan els tenor l'interess da la clientella cun cumprar ils cudeschs ed uschia era tenor las glistas da bestsellers da TikTok. Quels cudeschs èn lura era savens emprestads. Per ch'uffants na possian betg leger ils cudeschs che n'èn betg adattads a lur vegliadetgna, fa la biblioteca quai simplamain cun l'abunament. In uffant cun in abunament d'uffant na po betg emprestar in cudesch da creschids. Per pudair emprestar cudeschs da creschids han ins dad esser almain 16 onns.