Siglir tar il cuntegn

Header

In curtin ed ina mattatscha.
Legenda: Maletg simbolic. Keystone
cuntegn

Boom da far iert Schanzas e sfidas per ils centers d'orticultura

Schegea che las orticulturas èn cuntentas dal grond interess vid lur products, han els da sbatter cun shops online ch’èn surchargiads e clients cun memia pauc pazienza.

Damai che far cumpras direct tar l'ortulan u en in center d'orticultura n’è betg pussaivel mumentan, viagia la vendita via e-mail, telefon u cunzunt sur ils shops online. La dumonda suenter terra, sems e fluras en stizuns virtualas è gronda. Fatschentas grondas scrivan sin lur homepage ch’i giaja actualmain – pervia da la gronda dumonda – pli ditg, fin che la rauba arrivia tar ils clients, .

Damai che uschè blera glieud emposta tuttenina online, han fatschentas sco per exempel la Landi stuì bajegiar ora lur capacitad dal server, per che l’entir sistem na crodia betg ensemen, ha ditg la pledadra da medias, Sandra Grossenbacher, envers RTR.

Da sbatter cun clients malpazients

Il manader da fatschenta da l’orticultura Wieland a Tumein, Pascal Keller, di ch’els hajan mumentan fitg blera lavur. Tuts veglian uss metter iert.

Cunzunt da guardar che las empustaziuns sajan uschè spert sco pussaivel prontas per ils clients, dettia blera lavur. Pertge ils clients n'hajan mumentan, schegea ch’els avessan massa temp, betg pazienza, di Pascal Keller. Era saja grev da far chapir la glieud che la situaziun actuala saja era ina sfida per els e che tut giaja uss in zichel pli ditg.

Auter vesa quai ora tar la Giardinaria Müller a Susch. La manadra da fatschenta, Elisa Bonorand-Müller, di ch’ils clients hajan uss da spetgar pli pauc ditg, che sch’els vegnissan normal en stizun. Uss possia ella far pront tut ed ils clients possian lura vegnir per la rauba.

Schegea che la dumonda suenter products dad iert è mumentan fitg gronda, saja la svieuta tuttina in bun zic pli pitschna che normalmain, dian Elisa Bonorand-Müller, Pascal Keller e la Landi.

Artitgels legids il pli savens

Scrollar a sanestra Scrollar a dretga