Siglir tar il cuntegn

Header

cuntegn

Boom da fitness I na dovra betg mo proteins

Il trenament da forza engrondescha la capacitad fisica, reducescha la ristga da blessuras e meglierescha la tenuta dal corp. Fitness na serva betg mo a l'aspect estetic, mabain survegn grazia a l'effect positiv adina dapli impurtanza sco sport da sanadad. Igl è però er da resguardar intgins puncts.

Fitness

Suar, currer, auzar paisas, meglierar il svilup muscular e la cundiziun u ditg auter: far fitness. Sport en general è bun per la sanadad. Motivs per far fitness pon esser differents: furmar ils musculs, survegnir ina buna coordinaziun, tschentar giu il chau, sa sentir meglier ed anc blers auters motivs. Fatg è che fitness fa bain al corp ed al spiert.

audio
Tgi fa propi daco e co fitness?
ord Actualitad dals 02.05.2023. Maletg: Keystone
laschar ir. Durada: 4 minutas.

Per cuntanscher la finamira, dovri trenament e quai regularmain. Fitness dovra bler disciplina. Tenor il coach da fitness Mathias Steuber, dettian blers si lur finamiras suenter 3 mais. Bleras persunas fetschian in propiest durant l'onn nov, dentant na tegnian betg la dira.

Igl è pussaivel da sviluppar 10-12kg massa musculara entaifer 1 onn.
Autur: Mathias Steuber Trenader da fitness

Ins survalitescha bler tge ch'ins dumogna en curt temp e sutvalitescha il potenzial a lunga vista, sco ch'il trenader da fitness menziuna. En l'emprim onn saja pussaivel da sviluppar radund 10-12kg en furma da musculatura. Quai dentant mo sch’ins vegn da metter sut in tetg il trenament, la regeneraziun ed il nutriment.

Nutriment

Per sviluppar musculatura sto il nutriment constar.

Basegn da calorias

Avrir la box Serrar la box
  • Tar l’um: Tar ils signurs cun main che 30 minutas moviment per di è il basegn da calorias en media tar circa 2'100 fin 2'500 kcal per di. Tgi che sa mova pli ch’ina mes’ura fin in’ura corporalmain dovra circa 2'500 fin 2'700 kcal per di. Tar pli ch’ina ura da moviment per di dovran ils umens circa 3'000 fin 3'500 kcal per di.
  • Tar la dunna: Las dunnas dovran circa 1'800 fin 2'000 kcal per di, sch’ellas èn main che 30 minutas en moviment. Tar ina mes’ura fin in’ura d’activitad corporala s’augmenta il dumber da calorias a circa 2'000 fin 2'200 kcal per di. Dunnas che han pli ch’ina ura moviment a di dovran circa 2'400 fin 2'800 kcal per di.

Sche ti vuls prender giu, stos ti mangiar pli paucas calorias che quai che ti dovras.

audio
Proteins – necessari u marketing?
ord Actualitad dals 02.05.2023. Maletg: Keystone
laschar ir. Durada: 4 minutas 25 Secundas.

Protein u cun auters pleds alv d'ov. Quai per mantegnair e sviluppar musculatura, regenerar il sistem d'immunitad e per curar blessuras. Glieud pli veglia dovra dapli proteins, sco che di Giulia Casale, cussegliadra da nutriment.

Senza protein, nagin svilup muscular.
Autur: Giulia Casale Cussegliadra da nutriment

Quant protein?

Avrir la box Serrar la box
  • Ina persuna creschida dovra en media rodund 0.8 g protein per kg pais dal corp. Quai signifitga per ina persuna che paisa 60 kg minimum 48 g protein a di.
  • Ina persuna pli veglia dovra rodund 1,2 – 1,5 g protein per kg pais dal corp.
  • En l'exempel dad ina persuna pli veglia da 60 kg na fiss quai betg pli radund 50 g protein a di, mabain 70-90 g.

En il mintgadi possian quels products che han in supplement da protein gidar, sch'ins na vegnia cun il nutriment en il mintgadi betg sin la summa ch'ins dovra. Dentant adatg! Mo fidar a quels products na duessan ins betg! Proteins na gidan betg mo la musculatura, mabain cuntegnan er calorias. Bleras e blers che fan fitness prendan supplements da protein u er ’shakes’ cun pulvra da protein. Malsanadaivels na sajan quels betg, mo ins stoppia dar adatg da tuttina magliar equilibradamain. Products natirals sajan la dretga via.

Regeneraziun

Il corp dovra regeneraziun per sviluppar musculatura. Quai munta da laschar ruassar la musculatura 1 di minimal. Quai dovri per che la musculatura po crescher. Era il durmir gioga ina rolla. Ins duess durmir 7 uras, meglier fiss 8 uras. Durant durmir regenerescha il corp la musculatura il meglier.

Centers da fitness suenter la pandemia

Durant la pandemia na devi nagina pussaivladad da trenar en centers da fitness. Las persunas che levan trenar, stuevan ir autras vias sco per exempel trenar giuadora u a chasa. Quai ha gì ina influenza e quai sentian centers da fitness anc uss. Cunzunt il patratgar dad intgins saja sa midà durant quest temp, sco che Mathias Steuber in Fitness-Coach da Cuira, di. Midadas sentia el cunzunt en il sectur da vegliadetgna. Persunas pli veglias na vegnian betg pli tant a trenar sco avant la pandemia.

audio
Svilup suenter la pandemia a maun d'in exempel
ord Actualitad dals 02.05.2023. Maletg: Keystone
laschar ir. Durada: 2 minutas 54 Secundas.

Impressiunant chatta el che tants giuvenils entschaivan a far fitness. I saja radund 20% dapli giuvens e giuvnas tranter 14-16 onns che vegnian a trenar che avant la pandemia. Quai porta er intginas sfidas, numnadamain ston quellas persunas ch'èn uschè giuvnas vegnir survegliads dad in dals geniturs. Quai haja probabel er da far cun quai ch'els dettian pussaivladads da pajar pli flexiblas che avant. Avant la pandemia devi en lur center mo la pussaivladad da pajar annualmain e dapi ch'els han puspè avert il center, porschan els abunaments dal mais. Quai tiria dapli giuvenils e cunzunt er giuvnas.

I saja bun che dapli glieud giuvna vegnia a trenar, dentant saja donn che persunas in pau pli veglias n'hajan betg pli quest interess dad ir a fitness. Cunzunt persunas pli veglias duvrassan tenor el quest trenament. Obtegnair u schizunt sviluppar musculatura possia giugar ina rolla impurtanta en la vegliadetgna.

RTR actualitad 07:00

Artitgels legids il pli savens