Da nov pon ins viandar da la staziun da la Punt/Rehanau, sut l’autostrada A13 ora, sur la punt da fier dal tren vi enfin a Panaduz. Christian Theus, president da l’uniun Die Rheinschlucht/Ruinaulta, è intgantà. Ussa saja pussaivel da traversar il Rain, là, nua ch’ils dus flums culan ensemen. Quai saja in punct magic ed ina vista spectaculara.
Pitschen confiert
Suenter che la senda da viandar tranter Trin e Versomi ha gì fatg naufragi saia quai in pitschen confiert, che almain questa part dal project Ruinaulta saja finì, uschia Theus. El è dentant persvas che l’entir tschancun da la Ruinaulta saja accessibel per viandants e viandantas sin il pli tard l’onn 2024/25.
Magnet per il turissem da stad
Christian Theus siemia da nova infrastructura, na betg en la Ruinaulta sezza, mabain enturn enturn. Per exempel pudessi dar in pavigliun a la Punt/Rehanau, ina staziun da bus a Valendau u ina plazza da campar a Versomi.
Quest project che jau hai dastgà manar enfin uss è simplamain ina perla, in vair magnet per il turissem da stad.
Dentant dapli viandants e viandantas, bikers e persunas che van cun cajac munta era dapli potenzial per conflicts. La senda è savens stretga, sche viandants entaupan bikers na pon quels betg in sper l’auter ora, senza guntgir, uschia Pirmina Caminada, rangera e spezialista da la natira.
Proteger animals e natira
E lura èsi era da dar quità a natira ed animals. Sur tut al gravarel, in utschè rar. En Svizra datti en tut mo 120 pèrs da quests utschels, 60 en il Grischun, 30 en la Ruinaulta.
Ir sin tualetta è in problem, i duvrass dapli pussaivladads. Era il rument è in tema. I dat adina puspè persunas che fan in fieu sper il Rain e laschan enavos tut.
Per che la Ruinaulta restia il paradis natiral ch’ella è, giavischass Pirmina Caminada, che visitadras e visitaders giajan cun respect tras la natira, cun respect per animals e flurs.
