Otg persunas èn mortas pervia da la crudada da crappa a Bondo l'onn 2017. Quai, er sch'i era encounuschent avant ch'il Cengalo sa mova. L'Uffizi da guaud e privels da la natira n'ha dentant betg reagì, e las raschuns per quai n'èn betg enconuschentas.
Fin oz naginas respostas
La procura publica aveva examinà il cas ed è vegnida a la conclusiun che nagin saja responsabel per la mort da las persunas. Ella aveva dentant sa basà sin in'expertisa da l'Uffizi da guaud e privels da la natira. Il medem uffizi che avess gì d'avertir dal privel. Il Tribunal federal ha perquai decidì che la procura publica sto anc ina giada intercurir il cas.
Uss ha la Dretgira chantunala decidì che la procura publica ha puspè sa basà sin ina expertisa d'ina partida partischanta. L'expert ch'aveva scrit l'expertisa haja gì pliras relaziuns cun il chantun. Tranter auter è el en il cussegl administrativ d'ina interpresa che lavura per l'Uffizi da guaud e privel. Ed el è er stà involvì tar il management da privel a Bondo avant la crudada da crappa.
Uss sto la procura publica chattar in'ulteriura giada in expert u ina experta per cuntinuar cun il process giuridic.
Karalus è cuntenta cun questa decisiun
Dorothe Karalus è cuntenta cun questa decisiun. Ella aveva pers ses bab tar la bova. Tenor ella duai il nov expert esser independent, forsa schizunt da l'exteriur per pudair dar in sguard pli objectiv sin quest cas.
Anna Giacometti è da quest temp stada la presidenta communala da la Bregaglia, era ella ha fatg part da la decisiun da laschar avert las sendas da viandar. Ella scriva sin dumonda dad SRF:
Per mai n'èsi betg cler sco la procura publica ha nominà quest expert ch'è uss vegnì refusa da la Dretgira chantunala. Las partidas pertutgadas han il dretg da laschar sclerir quest cas entras in expert neutral.
Procura publica vul ina retschertga da cumprova correcta
Proponì quest expert aveva il procuratur public Bruno Ulmi. La procura publica ha uss prendì enconuschientscha da questa decisiun ed acceptia quella, di Ulmi.
Nus sperain ch'era tschellas partidas na vegnan betg ad ir vinavant cun questa decisiun al Tribunal federal.
La procura publica vegnia uss a tschertgar in nov expert. Ulmi chatta quai fallà da dir ch'i stoppia exnum esser insatgi da l'exteriur. Impurtant saja che la cumprovas vegnan prendidas a moda correcta.
Cun la decisiun da la Dretgira chantunala munta quai dapli che tschintg onns pli tard: puspè enavos a l'entschatta.