La pendiculara veglia saja a la fin da ses temp da vita, declera Patrick Arnet, il mainafatschenta da las pendicularas. Ella ha en il passà adina puspè procurà per disturbis da manaschi. Els veglian garantir vinavant la segirtad da manaschi da la telecabina veglia.
Nus investin plirs tschientmilli francs per garantir la segirezza dal manaschi.
La construcziun d'atschal è veglia. Per ch'i na dettia betg adina puspè reparaturas e ch'il manaschi stettia airi, vegnan ins a remplazzar la construcziun d'atschal. Quai na vul dentant betg dir ch'i na dovria betg la pendiculara nova. «Quai serva simplamain che nus pudain garantir la segirtad dal manaschi per 260 dis l'onn enfin che la pendiculara nova è bajegiada».
I custa dapli che planisà
Il rom dal preventiv era senza resguardar la chareschia tar max. 30,5 milliuns. La stimaziun actuala dals custs da la BCD per l'investiziun en la nova pendiculara importa 35 milliuns. Actualmain vegnan elavurads ensemen cun la citad da Cuira ils ulteriurs pass. Quels èn dependents dal rapport che vegn fatg per incumbensa da la cumissiun da gestiun.
Anc tschintg nums
Per la nova pendiculara manca er anc in num. Avant dus onns han las Pendicularas da Cuira (BCD) dumandà, co che la nova pendiculara duai avair num. Igl èn entradas da 836 persunas 418 propostas da num. Las pendicularas laschan ussa votar davart las tschintg propostas las pli numnadas. Da selecziunar èn ils nums: Bahnbrüesch, Brambrüeschbahn, Brambus-Express, Pizokel-Bahn oder Uffa-Bahn. Las abunentas ed ils abunents dastgan votar fin la fin da november.