En ils ultims onns ha la branscha da communicaziun fatg atras ina dretga midada. Dal model classic cun ina agentura plitost gronda ed ina purschida fitg vasta – ch'è blers onns stà la norma en la branscha – hai dà in trend tar in model d'ina agentura plitost pitschna cun ina purschida relativ concentrada. Surtut giuvens hajan ils davos onns fatg quest pass – quai che Ramona Deplazes ed Armin Spescha decleran cun ina midada da generaziuns. La generaziun giuvna saja pli segira da sasezza ed emprova simplamain ora ina giada – quai hajan ins betg propi gughegià pli baud.
Model classic cun persvasiun
Armin Spescha lavura era oz anc tenor il model «classic». El ha ina fatschenta da passa 60 collavuraturs e collavuraturas che porscha ina spierta enorm vasta. Ils ultims onns haja el observà, che diversas agenturas cumprovadas che han lavurà tenor il medem model sco el, han serrà lur portas u midà model. Tuttina saja el oz anc adina persvadì dal tuttafatg da ses model da fatschenta. Cunquai ch'i dettia betg pli tants che han ina purschida uschè vasta sco el – haja el chattà ina nischa che marschia enorm bain. El ha constatà che ses clients èn pli e pli savens interpresas pli grondas che vulan che tut lur communicaziun vegn fatga da la medema agentura.
Tuts lavuran bain in sper e cun l'auter
Ramona Deplazes è stada emploiada en ina agentura da reclama sco graficra. Avant 1 onn e mez ha ella dentant gughegià – ensemen cun sia co-fundatura Simara Bernardo – il pass en l'independenza professiunala. Oz mainan ellas en duas lur pitschna agentura da grafica nua ch'ellas porschan ina spierta plitost concentrada. Sch'ina clienta u in client giavischia lavurs ch'ellas porschan betg sezzas, lavuran ellas savens cun autras pitschnas agenturas en in «collectiv». Ella na sentia nagin'atmosfera da concurrenza en la branscha – tuts lavurian bain in sper/cun l'auter.
Tuts dus sa sentian fitg bain cun lur model da fatschenta – ed hajan betg il sentiment che mo in da quels models saja abel da surviver en la branscha da communicaziun ch'è enorm volatila.