Avant in mais hai dà ina bova en la Bregaglia, pli exact en la Valun dal Largh. Quella è vegnida chaschunada da ferms urizis. Pir uss èsi dentant cler tge donn che quella bova ha chaschunà per la populaziun dals peschs en il flum Maira.
Chattà be trais peschs
Pervi da la concentraziun massiva da substanzas turblas en il flum han ins chattà be trais peschs sin tut en tut quatter trajects, da mintgamai 200 meters. Per in flum da questa grondezza munta quest resultat che la populaziun da peschs è probablamain vegnida stgatschada fin il cunfin dal pajais.
Pervi da diversas barrieras en il flum e la mancanza da flums laterals cun peschs, na pon ils peschs betg puspè popular il traject pertutga a moda natirala. Quant enavant che la Maira po puspè vegnir restabilida sco aua da peschs, sto uss vegnir mussà a maun d’ina analisa detagliada ed ina valitaziun da las pussaivladads. Quai ha communitgà l’Uffizi da chatscha e pestga.