En il budget 2026 quinta il cusseglier guvernativ Martin Bühler cun cifras stgir-cotschnas. Uschia cuntinuescha il trend tar ils budgets dapi il 2023 cun deficits budgetads adina pli auts.
Las raschuns èn tenor il chantun las expensas totalas che creschan pli fitg che las entradas totalas. Sin las expensas da bun 3,068 milliardas francs (+3,1%) fruntan las entradas da 2,926 milliardas francs (+2,4%). Uschia resulta in deficit da 111,6 milliuns francs – marcant dapli ch'ils 87,2 milliuns dal budget per quest onn. Perquai na datti tenor il minister da finanzas Martin Bühler nagin spazi per ulteriuras expensas.
Expensas creschan pli fitg che las entradas
Tranter las raschuns principalas per la creschientscha da las expensas èn las contribuziuns a terzs cun +7,4%. La gronda part da questas expensas èn là en il sectur social, da sanadad e la scolaziun. Concret è quai las premias per cassas da malsauns ed ils ospitals, ed era tras la nova lescha da scola e contribuziuns pli grondas per la tgira d'uffants cumplementara a la famiglia. Las expensas per il persunal creschan per 0,1%.
La raschun che las entradas creschan main che las expensas vesa il chantun tar la reducziun dal pe da taglia per 5 puncts procentuals dapi il 2024 e la cumpensaziun da l'uschenumnada progressiun fraida l'auter onn, che crescha 1% pli fitg che l'onn avant. Però era la contribuziun pli pitschna ch'il Grischun survegn ord la gulivaziun da finanzas federala giaja uschia en il budget.
Investiziuns da record
Las investiziuns ch'il chantun Grischun finanziescha en il budget 2026 muntan ad in record da 373,6 milliuns francs. La gronda part da questas expensas per projects currents sco per exempel il nov center per la Scol'auta spezialisada a Cuira.
Spezialmain creschan era las investiziuns da terzs cun in plus da 21,1% (+35,2 miu.), sco per exempel era las contribuziuns a la vischnanca Albula/Alvra per la translocaziun preventiva da la populaziun da Brinzauls (20 miu.).
2025 va il chantun vi dal chapital agen
Per il quint current quinta il chantun bain cun in surpli d'entradas da radund 40 milliuns francs, enstagl dal deficit budgetà dad 87,2 milliuns. Però saja anc da resguardar contribuziuns spezialas per la protecziun dal clima e l'innovaziun da radund 200 milliuns francs e contribuziuns d'investiziun per l'infrastructura relevanta per il sistem. Qua saja previs da cumpensar ina part cun reducir il chapital agen dal chantun. Quai tenor Martin Bühler però mo en il rom che las finanzas restian era en l'avegnir stabilas.
Il preventiv per l'auter onn va ussa en la sessiun d'enviern dal Cussegl grond.
