Siglir tar il cuntegn

Header

Video
Stemprà «Burglind» furiescha
Or da Telesguard dals 03.01.2018.
laschar ir
cuntegn

Grischun «Burglind» ha chaschunà caos

«Burglind» ha chaschunà donns e caos en grondas parts da la Svizra. Il stemprà ha era furià en il Grischun. Blessads n'hai betg dà. La polizia chantunala ha dentant survegnì bleras annunzias da donns.

Il pli impurtant en curt dal Grischun

  • La polizia chantunala dal Grischun ha survegnì var 40 annunzias da donns entaifar duas uras.
  • En il Grischun n'èn naginas persunas vegnidas blessadas.
  • Pliras vias e pendicularas èn stadas serradas. Tranter auter era il traject da la Matterhorn Gotthard Bahn (MGB) sur il pass Alpsu e tras la Val Ursera da Hospental a Realp ed era vinavant tras il tunnel dal Furka.

Donns hai tranter auter dà perquai che plantas èn crudadas enturn. Surtut la Val dal Rain grischuna è stada pertutgada. En la chapitala ha il vent sfratgà davent il spitg da la planta «mammut sequoiadendron» da 150 onns sin l'areal dal museum d'art a Cuira. Talas plantas datti paucas en il Grischun. En il Partenz èn pliras vias lateralas serradas pervi dal privel da lavinas u pervi da donns. La lingia da tren tranter Claustra a Tavau è stada interrutta. L'Engiadina e las valladas dal sid n'ha il vent betg tutgà.

Caos en l'entira Svizra

En las ulteriuras parts da la Svizra ha il stemprà «Burglind» buffà cun fin a 200 kilometers l’ura.

  • L’autostrada A1 è stada serrada perquai che camiuns èn sa derschids.
  • A Lenk en la Part Sura Bernaisa èn otg persunas vegnidas blessadas suenter ch’in tren è vegnì ord ils binaris.
  • En il territori da skis Pizol en il chantun Son Gagl han las cabinas stuì vegnir evacuadas suenter che plantas èn crudadas sin las sugas.
  • Plirs sgols dals eroports da Basilea e da Turitg èn vegnids stritgads.

Berna sto quintar cun donns da fin 10 milliuns

L'orcan Burglind ha chaschunà en il chantun Berna donns da tranter 6 e 10 milliuns francs. Quai valitescha l'assicuranza d'edifizis chantunala. Sco quella ha ditg envers Radio SRF quintia ella cun fin a 5000 cas. Ils donns èn vegnids chaschunads entras plantas ch'èn crudadas enturn u objects ch'èn vegnids travaschads per l'aria enturn. Pertutgà particularmain saja Thun.

RR novitads 06:00