Burnout – er gia tar uffants

Ils ultims diesch onns è il dumber da cas da burnout tar uffants creschì enormamain. En il chantun Turitg datti diesch giadas dapli uffants che pateschan vi da sintoms d'in burnout – ed er en Grischun n'è la cifra betg vegnida pli bassa.

In uffant stanchel en scola. Bild in Lightbox öffnen.

Legenda da maletgs: Prest 4% dals uffants fan tras ina giada ina fasa da depressiun. Keystone

En la pratica dal servetsch psicologic dad uffants e giuvenils dal Grischun a Cuira vesa el adina daplis uffants cun depressiun, di Reto Mischol, il schef-psicolog.

Dapli stress fa mal il venter e piglia il plaschair

Blers uffants hajan mal il venter u il chau, sajan demotivads e senza plaschair. Il medi na chatta per il solit nagins problems en il corp sez. Quels problems vegnan lura da la psica.

En scola per exempel saja il squitsch pli grond che pli baud, raquinta Mischol. I saja dad emprender e da far dapli. Latiers vegnia l'internet. L'uffant stoppia adina esser sin il stand actual, na dastgia mai manchentar ina novitad. La saira sajan ils uffants fin tard en la notg vi dal handy – ed uschè dettia in squitsch permanent.

Sursiglir cuntegn supplementar

Tge è atgnamain in burnout'?

Il burnout è surtut in pled da moda. El descriva depressiun, dubis da sasez e temas tar persunas surlavuradas ni surdumandadas. Burnout sco term medicinal na datti però betg. «Burnout» è pli simpel e tuna era pli bain che «depressiun».

Ils geniturs fan stress – stress da prestaziun

In factur èn era ils geniturs. Blers vulan, che l'uffant giaja suenter la scola anc a far sport u a far musica. Quai possia esser memia bler per l'uffant.

Er sch'ils geniturs hajan sezs stress tar la plazza da lavur, badia l'uffant quai. La saira sajan ils geniturs stanchels è n'hajan betg pli l'energia per mirar grond per l'uffant. Sur pli lung temp sajan quai tut facturs che sappian chaschunar problems psichics tar l'uffant, resumescha il schef-psicolog Reto Mischol.

Gidar uschè baud sco pussibel

Impurtant saja da gidar uschè baud sco pussibel: Agid chattan famiglias pertutgadas tar ils medis da chasa, magisters u il servetsch psicologic da scola. Quels san gidar e cussegliar ils geniturs co vinavant en in tal cas.

Central per mintg'uffant: Avair in bun equiliber tranter sfidas e temp da ruaus.

RR actualitad 08:10