Sco quai che la vischnanca Albula/Alvra scriva en ina communicaziun, saja l’emprim mez onn d’emprova scadì, il project da pilot na vegnia betg cuntinuà. Sin dumonda dad RTR ha Bruno Zenklusen, il manader da fatschenta dal Puracenter ditg, che la svieuta saja stada cler sut las spetgas.
Duvrà avess quai radund 1'000 francs al di. L'entschatta hajan radund 40-50 persunas al di visità la butia, tge che deva fin 500 francs entradas al di. L'enviern sajan las entradas dentant sa sminuidas sin 20-80 francs al di cun tranter trais fin set persunas al di ch'hajan visità il container.
La vischnanca aveva mess a disposiziun il spazi per il container e l’infrastructura d’electricitad ch’i duvrava. En il container devi da cumprar radund 500 artitgels dal mintgadi. Entrà en butia vegniva cun agid dal telefonin cun ina app. Sur quella vegniva era gist pajà. Il container è anc avert fin la fin da favrer.
Il container a Rueras
La fin da favrer serra era il container a Rueras, ch'è vegnì installà avant radund in onn. Sco il manader da la stizun, Fredy Caminada ha ditg sin dumonda a la FMR, saja la svieuta memia pitschna per cuvrir ils custs. Oravant tut l'enviern na vegnia la purschida betg nizzegiada. Dentant haja il sistem cun il container funcziunà da princip, il Spar vegnia segiramain a cuntinuar cun il project e sviluppar vinavant quel ed adattar la software. Nua ch'il container va uss na sa era Fredy Caminada betg.
Or da l'archiv