A Panaduz han las bleras vias nums rumantschs, trais da las tschintg scolinas sa numnan Buccaruia, Zilip e Tschutli. Il rumantsch dal passà è omnipreschent. Chattar Rumantschs e Rumantschas oriundas da Panaduz è dentant grev. Persuenter audan ins pli e pli savens rumantsch da la Surselva, da l’Engiadina e dal Surmeir.
Jau hai il sentiment che blers a Panaduz discurran rumantsch. I fiss dentant interessant da savair exact quants.
Tenor la statistica d'abitants da la vischnanca da Panaduz 2019 vivan mo 14% burgais da Panaduz en il vitg, 70% èn Svizzers e Svizras tratgas natiers. Quants pertschients che discurran rumantsch u tudestg na sa la vischnanca betg.
Unda da Sursilvans
Ch’igl arriva pli e pli blers Rumantschs e Rumantschas en vischnanca, gliez croda en egl. Era ad in um ch’è vi da far laina. Prest sa chattian dapli Blumenthals e Casanovas a Panaduz che Bielers e Caluoris. Ils Rumantschs e las Rumantschas sajan part da la cultura da Panaduz e bainvegnids, dentant promover il linguatg rumantsch en scola, gliez giess memia lunsch.
Promoziun bainvesida
Auter tuna quai tar mammas ch'han uffants che discurran rumantsch. Ina lecziun rumantsch l’emna en scola fiss in grond agid per mantegnair il linguatg. Uschia discurrissan ils uffants da differents idioms forsa era rumantsch in cun l’auter.
RTR actualitad 17:00
