L'Allianza dal Center (AdC) vul defender ses sezs tar las elecziuns da las chombras federalas l'atun. Ils dus top-candidats èn il president da l'Assamblea federala Martin Candinas ed il cusseglier dals chantuns Stefan Engler. Quai ha la radunanza da nominaziun decis venderdi saira a Landquart. Pia cuntinuassan ils dus cussegliers mintgamai cun ina quarta perioda d'uffizi.
En tut han las delegadas ed ils delegads nominà quatter dunnas e sis umens per il Cussegl naziunal. La vegliadetgna media munta a 38 onns.
Martin Candinas è sisum l'emprima glista per il Cussegl naziunal. El vegn quest onn a stuair sa retegnair in zic cun s'exprimer davart temas concrets, damai ch'el è quest onn president dal Cussegl naziunal.
Sin la segunda glista stat Luana Bergamin il pli sisum. Ses num n'è anc betg uschè enconuschent sco quel da Candinas u Engler.
Finamira modesta da 20% da las vuschs
Per conquistar in segund sez en il Cussegl naziunal dependess l'Allianza dal Center da colliaziuns da glistas, hai gì num. E là na saja decidì anc nagut, i marschian tractativas. En mira saja da cuntanscher almain 20% da las vuschs.
Quai è pli pauc che tar las ultimas elecziuns avant quatter onns. Lura avevan la PCD e la PBD cuntanschì ensemen radund 25% da las vuschs. Cler è però che la partida giuvna vul er anc far duas glistas.
Las elecziuns da las chombras dal parlament federal èn quest atun, ils 22 d'october.
Tut ils candidats e las candidatas
Per il Cussegl dals chantuns:
- Stefan Engler, cusseglier dals chantuns, Surava.
Per il Cussegl naziunal:
| Glista 1 | Glista 2 | AdC giuvna glista 1 | AdC giuvna glista 2 |
| Martin Candinas, Cuira | Luana Bergamin, Lai | Corina Feuerstein, Claustra | Fabian Collenberg, Sumvitg |
| Eleonora Righetti, Verdabbio | Tino Schneider, Cuira | Sarina Caduff, Cumbel | Kim Bauer, Cuira |
| Reto Crameri, Surava | Kevin Brunold, Surcuolm | Sergio Pedroni, Vicosoprana | Men Flütsch, Ascharina |
| Ursin Widmer, Favugn | Nina Gansner, Seewis | Tobias Marty, Panaduz | Marina Keller, Tumegl |
| Renate Cadruvi-Lustenberger, Cuira | Martin Binkert, San Murezzan | Flavia Schaniel, Sumvitg | Luca Fanconi, Brusio |