- La WEKO ha decis il 2018 da sancziunar la firma da construcziun Lazzarini SA da Samedan 2 fin 2,5 milliuns francs pervi da pliras cuntravenziuns cunter la lescha federala davart ils cartels.
- Lazzarini SA ha tratg vinavant la decisiun da la WEKO davant il Tribunal administrativ federal.
- Gievgia sa han la Lazzarini SA e la WEKO s'inscuntradas per ina tractativa da la partida davant tribunal.
Preistorgia
Differentas firmas da construcziun dal Grischun han tranter il 2008 ed il 2012 furmà in cartel e fatg giu tranter ellas tgi che survegn tge lavurs. Quai è vegni scuvert entras in whistleblower. Quel ha furnì a las autoritads ils indizis decisivs davart il cartel da construcziun grischun. Sin quai è la cumissiun da concurrenza WEKO vegnida activada ed ha examinà pliras fatschentas da construcziun en l’entir chantun. Tranter auter èn vegnidas sancziunadas il 2018 set firmas pervi da cunvegnas nunlubidas davart ils pretschs cun chastis da fin var 5 milliuns francs.
Recurs davant Tribunal administrativ federal
Cunter la disposiziun han tut en tut trais interpresas fatg recurs davant il Tribunal administrativ federal. Tranter quellas sa chatta la Lazzarini SA da Samedan. Ella è vegnida chastiada da la WEKO cun 2 fin 2,5 milliuns francs. Lazzarini SA ha era pretendì ina procedura publica da las partidas, quella ha lieu la gievgia a Son Gagl.
Cumpetenzas:
- tracta recurs cunter ordinaziuns da l'administraziun federala
- controllescha per part era decisiuns chantunalas
La dretgira ha la Sedia a Son Gagl, occupescha 72 derschadras e derschaders ed è la pli gronda dretgira federala. Ella fa radund 6'500 decisiuns l'onn. Il tribunal datti dapi l'onn 2007.
La recurrenta s'oppona al resultat da l'inquisiziun da l'instanza precedenta sco er a l’undraziun giuridica. En spezial fa la Lazzarini SA valair che l'inquisiziun haja rimnà ils fatgs a moda incorrecta ed incumpletta, ch'els n'hajan betg fatg cunvegnas nunlubidas. Plinavant sajan las sancziuns illegitimas ed inadequatas. La cumissiun da concurrenza WEKO pretenda dentant ina refusa dal recurs.
Or da l'archiv
