Siglir tar il cuntegn

Header

cuntegn

Cas da direzza Chantun n'avra betg pli fitg sia bursa

Il Cussegl grond ha tractà ina resoluziun en connex cun ils cas da direzza en la pandemia da Covid-19. Radund 70 deputadas e deputads avevan pretendì dapli daners. La mesadad dad els ha dentant midà opiniun durant la debatta. La resoluziun è ida da l'aua giu.

Cun 34 cunter 77 vuschs è la resoluziun betg vegnida surdada a la regenza – quai malgrà che passa 70 deputadas e deputads avevan suttascrit ella. Durant la debatta han la mesadad da las deputadas e deputads midà opiniun. L'argument principal da la regenza cunter l'augment da daners per cas da direzza: Ins na sappia betg quant ditg che la pandemia giaja anc e quants daners ch’i dovria anc per las mesiras da sustegn.

audio
Resoluziun per dapli sustegn finanzial va da l'aua giu
ord Actualitad dals 18.02.2021.
laschar ir. Durada: 2 minutas 46 Secundas.

Quai vuleva la resoluziun

La resoluziun lantschada dals socialdemocrats avess pretendì ch'il maun public surpiglia enfin 100% dals custs fix per interpresas che pateschan da la pandemia - enfin uss èn quai 50%. Ultra da quai pretendeva ella era che dapli interpresas duain survegnir daners.

Quai è areguard la politica da finanzas in scandal da pretender che nus na sappian betg pajar quai.
Autur: Lukas Horrer deputà da la PS

Cunzunt las branschas da turissem e da gastronomia duain avair in access pli simpel a credits cun garanzias dal chantun. «Finanzialmain n'è quai nagin problem per il chantun Grischun, nus avain in agen chapital da 2,5 milliardas francs», di il socialdemocrat Lukas Horrer che ha instradà la resoluziun. Argumentar ch'ins na possia betg pajar quai, è tenor el in scandal.

Regenza cumbatta la resoluziun

Auter vesa quai il minister d'economia Marcus Caduff. El cumbatta cun tutta forza la resoluziun. Il chantun sclereschia gia, sch'ins possia auzar l'indemnisaziun. L'argument ch'il chantun haja avunda daners na lascha el betg valair: Quai saja in argument da la politica sanestra.

Insacura sto insatgi pajar enavos quels daners.
Autur: Marcus Caduff minister d'economia

Las opiniuns van pia dapart: Duai dar indemnisaziuns generusas per las interpresas u sto il chantun guardar da tegnair sut controlla las finanzas e persuenter forsa betg spendrar mintga interpresa?

audio
Resoluziun pretenda dapli daners
ord Actualitad dals 17.02.2021. Maletg: RTR
laschar ir. Durada: 3 minutas 10 Secundas.

Tant è gia pajà

Il chantun Grischun ha enfin oz pajà 1,5 milliuns francs per cas da direzza. Els hajan elavurà 44 dumondas, ha ditg il minister d'economia Marcus Caduff sin dumonda dad RTR. Contribuziuns d'ulteriurs 4 milliuns francs sajan er gia concedidas e vegnian pajadas ils proxims dis. Las reglas per cas da direzza vegnan er discutadas oz en il Cussegl grond.

audio
Marcus Caduff:
ord Novitads dals 17.02.2021.
laschar ir. Durada: 23 Secundas.

Ord l'archiv

video
Cas da direzza: Credit vegn augmentà
Or da Telesguard dals 22.01.2021.
laschar ir. Durada: 1 minuta 51 Secundas.

RTR novitads 12:00

Artitgels legids il pli savens