Siglir tar il cuntegn

Header

cuntegn

Cas da Pierin Vincenz Mark Pieth: «In schef tutpussant ch’ins ha laschà traffitgar»

Pierin Vincenz saja daventà uschè pussant a sias uras sco schef da la Raiffeisen ch’el haja pudì definir sez las reglas, di Mark Pieth, spezialist dal dretg penal d’economia. Persunas cun tala pussanza influenzeschian era, tgi che sesia en ils gremis ch’als controlleschian.

Mark Pieth enconuscha en detagl ils gronds cas economics da la Svizra. El vesa per exempel parallelas tranter il cas Vincenz e quel da Sepp Blatter, anteriur president da la FIFA. Tant Vincenz sco Blatter pretendian ch’els hajan agì correct, che tuttas expensas, respectiv spesas e fatschentas, sajan vegnidas lubidas.

Sche la controlla disdescha?

Pierin Vincenz haja retratg spesas nungiustifitgadas e fatg profits clandestins tar venditas da firmas. E quai sin donn e cust da la banca Raiffeisen, renfatscha la procura publica. Il cussegl d’administraziun avessia gì l’obligaziun da survegliar il schef da la Raiffeisen. Las spesas è fatschentas eran dentant tuttas vegnidas lubidas. Pon ins lura insumma far ina renfatscha a l’anteriur schef da la Raiffeisen?

Sch’jau surpass reglas, e la controlla na funcziuna betg, na ma distgargia quai betg. Jau na dastg betg, sche las controllas disdeschan, simplamain splimar mia interpresa.»
Autur: Mark Pieth spezialist dal dretg penal d’economia

 Grondas prestaziuns na giustifitgeschan betg tut

La Raiffeisen è oz la terz-gronda banca en Svizra. Gliez saja senza dubi d’engraziar a Pierin Vincenz, di Mark Pieth. Talas persunas prestian tant per lur interpresa ch'ellas vegnian savens ad in punct ch’ellas pensian che lur engaschi na vegnia betg remunerà avunda. «Gronds merits na munta dentant betg ch’ins dastga simplamain sa servir en la cassa.»

La fin da schaner tracta la dretgira cirquitala da Turitg il cas da Pierin Vincenz. Ensemen cun el èn anc accusadas sis ulteriuras persunas. I vala la presumziun d'innocenza.

Tgi che Mark Pieth è

Avrir la box Serrar la box
Legenda: L'anteriur professur per dretg penal a l'Universitad da Basilea Mark Pieth. MAD

Fin la stad passada è Mark Pieth stà professur per dretg penal a l’universitad da Basilea. El ha scrit numerus cudeschs, sco per exempel l’ovra da standard dal dretg penal d’economia. Las dretgiras che decidan davart delicts economics consulteschan las commentaziuns da Mark Pieth.

Plinavant è el sa profilà sin champ internaziunal en il cumbat cunter corrupziun. Dal 1990 fin il 2013 ha el presidià la gruppa da lavur da l’OECD cunter corrupziun en relaziuns commerzialas. Avant dus onns è cumparì ses cudesch «Goldwäsche – Die schmutzigen Geheimnisse des Goldhandels».

Mark Pieth (1953) è creschì si en Engalterra ed en la Bassa. Sias ragischs èn dentant a St. Peter-Molinis, quai ch’ins senta anc adina in pau vi da ses dialect.

 

RTR actualitad 11:00

Artitgels legids il pli savens